✍️ महाराष्ट्र २४ ।। ऑनलाईन ।। विशेष प्रतिनिधी ।। दि. २२ मार्च २०२६ ।। मध्यपूर्वेत सुरू असलेल्या अमेरिका-इस्रायल-इराण युद्धाचे परिणाम आता थेट सर्वसामान्यांच्या खिशावर उमटू लागले आहेत. आधी गॅस, पेट्रोल-डिझेल महागले आणि आता त्याची साखळी प्रतिक्रिया म्हणून घरगुती वापरातील फ्रिज, एसी आणि वॉशिंग मशीनसारख्या वस्तूंच्या किंमती वाढणार असल्याचे स्पष्ट संकेत मिळत आहेत. ऐन उन्हाळ्याच्या तोंडावर ही दरवाढ होणार असल्याने नागरिकांच्या अडचणीत भर पडणार आहे. महागाईचा हा नवा फटका केवळ इंधनापुरता मर्यादित राहिलेला नसून, तो थेट जीवनशैलीवर परिणाम करणाऱ्या वस्तूंवरही झाला आहे.
यामागचे मुख्य कारण म्हणजे पॉलिमर आणि प्लास्टिकच्या कच्च्या मालाच्या किमतीत झालेली प्रचंड वाढ. युद्धामुळे Strait of Hormuz या महत्त्वाच्या सागरी मार्गावरील वाहतूक विस्कळीत झाली आहे. परिणामी कच्चा माल वेळेवर पोहोचत नाही आणि वाहतूक खर्चातही मोठी वाढ झाली आहे. त्यातच रुपयाचे अवमूल्यन झाल्यामुळे आयात महाग झाली आहे. या सगळ्या घटकांचा थेट परिणाम उत्पादन खर्चावर होत असून, कंपन्यांना दरवाढ करण्याशिवाय पर्याय उरलेला नाही.
तज्ज्ञांच्या मते, एसीच्या किंमतीत ३ ते १० टक्के, वॉशिंग मशीनमध्ये ७ ते १० टक्के, तर फ्रिजमध्ये ४ ते ७ टक्क्यांची वाढ होण्याची शक्यता आहे. विशेष म्हणजे, वॉशिंग मशीनमध्ये प्लास्टिकचा वापर अधिक असल्याने त्याच्या दरवाढीचा परिणाम जास्त जाणवणार आहे. तसेच, पॅकेजिंग मटेरियल, केबल्स, इन्सुलेशन आणि तांब्याच्या किमतीत झालेली वाढही या दरवाढीला कारणीभूत ठरत आहे. म्हणजेच, ग्राहकाला फक्त उत्पादनच नव्हे तर त्याच्या प्रत्येक घटकासाठी जास्त पैसे मोजावे लागणार आहेत.
एकूणच, हे युद्ध आता सीमारेषेपुरते मर्यादित राहिलेले नाही. त्याचे पडसाद जागतिक अर्थव्यवस्थेत उमटत असून, त्याचा फटका भारतातील सामान्य नागरिकांनाही बसत आहे. पुढील काही आठवड्यांत परिस्थिती आणखी गंभीर होऊ शकते. त्यामुळे तज्ज्ञांचा सल्ला स्पष्ट आहे—गरज असेल तेव्हाच खरेदी करा आणि अनावश्यक खर्च टाळा, कारण महागाईचा हा भडका अजून काही काळ शांत होण्याची चिन्हे नाहीत.