🔥 “तिजोरी मजबूत, आश्वासनं दमदार – आता कामगिरीत दिसणार का जोर?” 🔥

Spread the love

महाराष्ट्र्र 24 – ऑनलाईन- दिनांक 23 मार्च- पिंपरी-चिंचवड महापालिकेच्या आर्थिक तब्येतीबाबत शंका उपस्थित करणाऱ्यांना थेट उत्तर देत आयुक्त डॉ. विजय सूर्यवंशी यांनी स्पष्ट शब्दांत सांगितले—महापालिका सक्षम आहे, निधीची कमतरता नाही आणि मोठमोठे प्रकल्प उभारणे पूर्णतः शक्य आहे! शहराची आर्थिक घडी भक्कम असल्याचा दावा करत त्यांनी येणाऱ्या काळात विकासाच्या नव्या पर्वाची चाहूल दिली. मात्र, नागरिकांच्या मनातला खरा प्रश्न अजूनही तसाच आहे—“हे सगळं कागदावरच राहणार, की प्रत्यक्षात रस्त्यावर उतरणार?”

पिंपरी चिंचवड शहर पत्रकार संघाच्या वतीने कै. भा. वि. कांबळे पत्रकार कक्षात आयोजित स्वागत समारंभात बापूसाहेब गोरे यांच्या हस्ते शाल व पुस्तक देऊन आयुक्तांचा सन्मान करण्यात आला. यावेळी अध्यक्षा सायली कुलकर्णी, ज्येष्ठ पत्रकार नाना कांबळे, बाळासाहेब ढसाळ, सुनील उर्फ बाबू कांबळे यांच्यासह अनेक पत्रकार उपस्थित होते. “शहर दरवर्षी ५ टक्क्यांनी वाढतंय, पण त्याच वेगाने समस्या वाढत आहेत,” अशी कबुली देत आयुक्तांनी पाणीटंचाई, अतिक्रमण आणि बेकायदा बांधकामांचा थेट उल्लेख केला. म्हणजेच, विकासाच्या गप्पा एकीकडे आणि वास्तवाची झळ दुसरीकडे—अशी दुहेरी परिस्थिती स्पष्ट झाली.

दरम्यान, बजेट मंजुरीनंतर मोठ्या प्रकल्पांची मालिका उभी राहणार असल्याचे सांगत आयुक्तांनी प्रशासनाच्या ‘दररोजच्या बैठका’ आणि ‘बारकाईने पाहणी’चा उल्लेख केला. पत्रकारांना “एक्सटेंडेड आयज अँड इअर्स” म्हणत त्यांनी टीकेचं स्वागत केलं, पण चांगल्या कामाची दखलही घ्यावी, असं आवाहन केलं. खराब रस्त्याच्या बातमीवर तात्काळ कारवाई झाल्याचा दाखला देत त्यांनी प्रशासन-माध्यम संबंध मजबूत राहतील असा विश्वास व्यक्त केला. मात्र, आता नागरिकांना फक्त शब्द नव्हे—तर खड्डेमुक्त रस्ते, नियमित पाणी आणि शिस्तबद्ध शहर हवंय… कारण आश्वासनांची तिजोरी भरलेली आहे, पण कामगिरीची उघडझाप अजूनही सुरूच आहे!