✍️ महाराष्ट्र २४ ।। ऑनलाईन ।। विशेष प्रतिनिधी ।। दि. २५ मार्च २०२६ ।।आखाती तणावाच्या पार्श्वभूमीवर देशभरात ‘लॉकडाउन’ आणि इंधन टंचाईच्या अफवांनी अचानक भीतीचे वातावरण निर्माण केले आहे. मात्र प्रशासनाने स्पष्ट केले आहे की भारतात पेट्रोल-डिझेलचा पुरवठा पूर्णपणे सुरळीत सुरू आहे आणि घाबरण्याचे कोणतेही कारण नाही.
तरीदेखील अफवांचा परिणाम म्हणून कोल्हापूर, जळगाव आणि नागपूरसह अनेक शहरांमध्ये पेट्रोलपंपांवर नागरिकांनी मोठ्या प्रमाणात गर्दी केली. काही ठिकाणी रात्रीपासूनच वाहनांच्या लांबच लांब रांगा लागल्या होत्या, तर बुधवारी पहाटे ५ वाजल्यापासूनच लोक इंधन भरण्यासाठी पंपांवर दाखल झाले.
जळगावमध्ये इंधनाचा पुरवठा उशिरा झाल्यामुळे सहा पेट्रोलपंप तात्पुरते ‘कोरडे’ पडले, ज्यामुळे अफवांना अधिक बळ मिळाले. नंतर काही पंपांवर साठा उपलब्ध होताच सेवा पुन्हा सुरू करण्यात आली. दुसरीकडे नागपूरमध्ये नंदनवन, वर्धा रोड, पंचशील चौक अशा भागांत मोठ्या रांगा लागल्याने वाहतूक कोंडी निर्माण झाली होती आणि पोलिस बंदोबस्त तैनात करावा लागला.
दरम्यान, आखाती भागातील संघर्षामुळे पुरवठा साखळीवर दबाव असला तरी भारताने विविध देशांकडून इंधन आयात वाढवली आहे. त्यामुळे देशात तातडीने इंधन टंचाई निर्माण होण्याची शक्यता नसल्याचे अधिकाऱ्यांनी स्पष्ट केले आहे.
महत्त्वाचे:
👉 पेट्रोल-डिझेल संपणार ही बातमी अफवा
👉 पुरवठा सध्या सुरळीत
👉 घाईगडबडीत साठेबाजी टाळण्याचे प्रशासनाचे आवाहन
एकूणच, भीतीमुळे निर्माण झालेल्या या परिस्थितीत नागरिकांनी अफवांवर विश्वास न ठेवता अधिकृत माहितीवरच भरोसा ठेवावा, असे प्रशासनाकडून वारंवार सांगितले जात आहे.