✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ३१ मार्च २०२६ ।। आखाती तणावाने आता थेट भारतीय अर्थव्यवस्थेची नस पकडली आहे. पश्चिम आशियात सुरू असलेल्या युद्धजन्य परिस्थितीमुळे कच्च्या तेलाचे दर भडकले आणि त्याचा परिणाम सोमवारी रुपयावर जोरदारपणे उमटला. अमेरिकन डॉलरच्या तुलनेत रुपया तब्बल 95.22 या ऐतिहासिक नीचांकावर घसरला. ही केवळ आकड्यांची घसरण नाही, तर अर्थव्यवस्थेसाठी धोक्याची घंटा आहे. आयातखर्च वाढणार, महागाईचा भडका उडणार आणि सर्वसामान्यांच्या खिशावर त्याचा थेट परिणाम होणार—अशी परिस्थिती निर्माण होत आहे.
या घसरणीमागे केवळ तेलदर वाढ नाही, तर जागतिक गुंतवणूकदारांचा बदललेला कलही कारणीभूत ठरत आहे. परदेशी गुंतवणूकदारांनी भारतीय बाजारातून हात आखडता घेतल्याने रुपयावर दबाव वाढला आहे. त्यातच इराण, अमेरिका आणि इस्रायलमधील वाढता संघर्ष, मध्य पूर्वेतील अस्थिरता आणि जागतिक बाजारातील अनिश्चितता यामुळे भारतीय चलनाची स्थिती आणखी कमकुवत झाली आहे. आर्थिक तज्ज्ञांच्या मते, ही घसरण तात्पुरती नसून पुढील काही काळासाठी दबाव कायम राहू शकतो.
रुपयाची ही घसरण म्हणजे सर्वसामान्यांसाठी दुहेरी मार आहे. पेट्रोल-डिझेल महागणार, आयातीत वस्तूंचे दर वाढणार आणि महागाईचा फटका अधिक तीव्र होणार. उद्योगक्षेत्रासाठीही हा इशारा आहे, कारण उत्पादन खर्च वाढण्याची शक्यता आहे. एकूणच, आखाती युद्धाचे पडसाद आता थेट आपल्या खिशावर उमटताना दिसत आहेत. जागतिक घडामोडी किती वेगाने स्थानिक अर्थव्यवस्थेला हादरा देऊ शकतात, याचे हे ज्वलंत उदाहरण ठरत आहे.