✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ८ एप्रिल २०२६ ।। मुंबईकरांचा रोजचा प्रवास म्हणजे जणू संयमाची परीक्षा! लोकलमध्ये गर्दी, रस्त्यावर ट्रॅफिक आणि वेळेचं गणित नेहमीच बिघडलेलं. पण आता या सगळ्याला पर्याय म्हणून एक भन्नाट उपाय समोर येतोय — ड्रायव्हरलेस पॉड टॅक्सी! मुंबई शहरात आधुनिक वाहतुकीचा नवा अध्याय सुरू होणार असून कुर्ला ते वांद्रे दरम्यान पहिल्या टप्प्यात ही सेवा सुरू होणार आहे. अवघ्या 3.36 किमीच्या या मार्गावर 8 स्थानकं असतील आणि विशेष म्हणजे दर 30 सेकंदांनी एक पॉड उपलब्ध असेल! म्हणजे बस-लोकलची वाट पाहण्याचा त्रास संपणार आणि “कधी येणार?” हा प्रश्नही इतिहासजमा होणार!
या प्रकल्पाचं केंद्र असेल बांद्रा-कुर्ला कॉम्प्लेक्स — मुंबईतील सर्वात व्यस्त आणि महत्त्वाचं व्यावसायिक केंद्र. रोज हजारो कर्मचारी या भागात ये-जा करतात. त्यामुळेच कुर्ला, वांद्रे पूर्व, कलानगर, एलबीएस मार्ग अशा ठिकाणांना जोडणारी ही पॉड टॅक्सी म्हणजे ‘टाईम सेव्हिंग मशीन’च ठरणार आहे. प्रत्येक 200 मीटरवर वातानुकूलित स्थानकं, एका पॉडमध्ये 6 प्रवासी आणि ताशी 40 किमी वेग — म्हणजे आराम आणि वेग यांचा परफेक्ट संगम! आणि हो, ही टॅक्सी पूर्णपणे ड्रायव्हरलेस असेल. 8 मीटर उंच खांबांवरून जाणाऱ्या एलिव्हेटेड ट्रॅकवर ही छोटीशी गाडी धावेल, त्यामुळे खालील ट्रॅफिकला काहीही अडथळा नाही.
भाड्याबाबतही फार ताण घेण्याची गरज नाही. अंदाजानुसार प्रति किलोमीटर सुमारे 21 रुपये दर असू शकतो. म्हणजेच कमी वेळात, कमी त्रासात आणि परवडणाऱ्या दरात प्रवास — अशी ‘तीनही फायदे’ एकाच वेळी! 2027 पर्यंत ही सेवा सुरू होण्याची शक्यता असून 2031 पर्यंत मार्ग 8.85 किमीपर्यंत वाढवण्याची योजना आहे. रोज तब्बल 1 लाखाहून अधिक प्रवासी या सेवेचा वापर करतील, असा अंदाज आहे. थोडक्यात, मुंबईच्या गर्दीला आता ‘स्मार्ट’ उत्तर मिळणार आहे. प्रश्न फक्त एकच — मुंबईकर तयार आहेत का या भविष्याच्या प्रवासासाठी? 🚀