✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ८ एप्रिल २०२६ ।। प्रवास म्हणजे स्वप्न… पण त्या स्वप्नांना आता किंमतीची पंखं लागली आहेत! ८ एप्रिलपासून Air India ने जाहीर केलेल्या नव्या इंधन अधिभारामुळे विमानप्रवास ‘सहज’ राहणार नाही, हे स्पष्ट झालं आहे. कालपर्यंत तिकीट बुक करताना फक्त सीटची चिंता असायची; आता ‘किती पैसे मोजावे लागतील?’ हा प्रश्नही प्रवाशांच्या मनात घर करून बसणार आहे. कारण कंपनीने अंतरावर आधारित नवीन अधिभार प्रणाली लागू करत प्रवाशांच्या खिशावर थेट बोजा टाकला आहे.
देशांतर्गत प्रवासासाठीचे नवे दर पाहिले, तर चित्र अजूनच स्पष्ट होते. ० ते ५०० किमी अंतरासाठी २९९ रुपये, ५०१ ते १००० किमीपर्यंत ३९९ रुपये, १००१ ते १५०० किमीवर ५४९ रुपये, १५०१ ते २००० किमीवर ७४९ रुपये आणि २००० किमीपेक्षा जास्त अंतरासाठी तब्बल ८९९ रुपयांचा इंधन अधिभार लागू करण्यात आला आहे. म्हणजेच ‘जितकं उडाल, तितकं भराल’ हीच नवी नीती! आंतरराष्ट्रीय प्रवाशांनाही याचा फटका बसणार असून, तिकिटांच्या किंमतीत लक्षणीय वाढ होण्याची चिन्हे आहेत. प्रवासाच्या आधीच ‘बोर्डिंग पास’पेक्षा ‘बिल’ जड वाटण्याची वेळ आता आली आहे.
या वाढीमागचं कारणही तितकंच गंभीर आहे. जागतिक स्तरावर जेट इंधनाच्या दरात झालेली झपाट्याने वाढ ही या निर्णयामागची मुख्य ताकद ठरली आहे. फेब्रुवारीच्या अखेरीस सुमारे ९९ रुपये असलेला दर मार्चच्या शेवटी जवळपास १९५ रुपयांवर पोहोचला — म्हणजेच दुप्पट वाढ! अशा परिस्थितीत एअरलाईन्स कंपन्यांकडे दरवाढीशिवाय पर्याय उरलेला नाही. पण या सर्व गोंधळात एकच प्रश्न उरतो — ‘आकाशात उडणं’ आता सामान्य माणसासाठी परवडणार का? की विमानप्रवास पुन्हा एकदा श्रीमंतांच्या आवाक्यात जाणार? ✈️