✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ८ एप्रिल २०२६ ।।8th Pay Commission Latest News: केंद्रीय कर्मचाऱ्यांच्या पगारवाढीची चर्चा सुरू झाली की, आशा-अपेक्षांचे ढग दाटून येतात… आणि मग एखाद्या बैठकीच्या तारखेला ‘निर्णायक’ असा शिक्का मारला जातो! १३ एप्रिल २०२६ रोजी होणारी National Council (JCM) ची ड्राफ्टिंग कमिटी बैठकही तशीच ‘मोठी’ म्हणून रंगवली जात आहे. पण वास्तव इतकं साधं नाही. ही बैठक म्हणजे अंतिम वेतनवाढीचा निर्णय देणारी नसून, ८व्या वेतन आयोगासाठी तयार होणाऱ्या प्रस्तावाचा फक्त आराखडा ठरवणारी आहे. म्हणजेच, चित्रपटाचा ट्रेलर आहे; क्लायमॅक्स अजून दूर आहे!
या बैठकीत वेतन, पेन्शन आणि सेवा अटींवर चर्चा होऊन एक संयुक्त मेमोरँडम तयार केलं जाणार आहे. याच दस्तऐवजावर पुढे ८वा वेतन आयोग विचार करणार. आधीच १२ मार्चच्या बैठकीत विविध संघटनांच्या मागण्या ऐकून घेतल्या गेल्या आहेत आणि आता त्यांना अंतिम स्वरूप दिलं जात आहे. कर्मचारी संघटनांनी फिटमेंट फॅक्टर ३.२५ किंवा त्याहून अधिक ठेवण्याची मागणी केली आहे. पण ‘मागण्या’ आणि ‘निर्णय’ यांच्यातील अंतर किती असतं, हे सरकारी प्रक्रियेचा अनुभव असलेल्यांना चांगलंच ठाऊक आहे!
सरकारने आधीच स्पष्ट केलं आहे की आयोगाला शिफारसी सादर करण्यासाठी १८ महिन्यांची मुदत आहे. म्हणजेच २०२७ पर्यंतच अंतिम निर्णय आणि अंमलबजावणीची शक्यता आहे. त्यामुळे १३ एप्रिलची बैठक महत्त्वाची असली तरी ती शेवट नाही, तर सुरुवात आहे. कर्मचाऱ्यांनी उत्सुकता ठेवावी, पण अपेक्षांना वास्तवाची जोडही द्यावी—कारण वेतनवाढीचा हा प्रवास अजून काही टप्पे पार करणार आहे!