✍️ महाराष्ट्र २४ ।। ऑनलाईन ।। विशेष प्रतिनिधी ।। दि. ८ एप्रिल २०२६ ।। पिंपरी-चिंचवडमध्ये एकेकाळी आजारी पडणं म्हणजे दोन संकटं—एक शरीराचं आणि दुसरं खिशाचं! उपचारांसाठी खाजगी रुग्णालयांची पायरी चढली की बिल पाहूनच रुग्ण पुन्हा आजारी पडायचा. आणि सरकारी रुग्णालय? तिथे जाणं म्हणजे लांबच लांब रांगा, गोंधळ आणि “उद्या या”चा कायमचा मंत्र! पण आता हे चित्र बदललं आहे. महापालिकेच्या मल्टिस्पेशालिटी रुग्णालयांनी ‘सरकारी’ या शब्दाला नवा अर्थ दिला आहे. इथे उपचार मिळतात—तेही वेळेत, नीटनेटके आणि सर्वात महत्त्वाचं म्हणजे परवडणाऱ्या दरात! त्यामुळे सामान्य माणसाला आता आरोग्यासाठी घर गहाण ठेवण्याची वेळ येत नाही, हीच खरी क्रांती आहे.
या बदलाचा केंद्रबिंदू ठरलंय वायसीएम रुग्णालय आणि त्याभोवती उभी राहिलेली आरोग्य सेवा साखळी. एकेकाळी फक्त एकाच रुग्णालयावर विसंबून असलेलं शहर आज विविध विशेष रुग्णालयांनी समृद्ध झालं आहे. नेत्रोपचार, माता-बालक सेवा, विविध विभाग—सगळं काही एका ठिकाणी नाही, पण योग्य ठिकाणी आणि योग्य पद्धतीने उपलब्ध आहे. त्यामुळे रुग्णाला ‘कुठे जावं?’ हा प्रश्न उरत नाही, तर ‘कुठे जावं हे ठरलेलं’ असतं. आकडे सांगतात की या व्यवस्थेवर लोकांचा विश्वास किती वाढलाय—लाखो रुग्णांनी बाह्य आणि आंतररुग्ण विभागात उपचार घेतले आहेत. ही संख्या फक्त आकडा नाही; ती लोकांच्या विश्वासाची पावती आहे.
महत्त्वाचं म्हणजे महापालिका केवळ आजारावर इलाज करत नाही, तर आजार टाळण्याचाही प्रयत्न करत आहे. शहरात उभारली जात असलेली आरोग्यवर्धिनी केंद्रं ही त्याचीच साक्ष आहेत. नवजात बालकापासून ते ज्येष्ठ नागरिकांपर्यंत सर्वांसाठी आरोग्य सेवा उपलब्ध करून देण्याचा हा प्रयत्न म्हणजे आरोग्य व्यवस्थेचा खरा कणा आहे. पुढे जळीत कक्ष आणि कर्करोग उपचार केंद्रांची उभारणीही प्रस्तावित आहे. म्हणजेच उद्याचा विचार आजच केला जातोय. एकेकाळी “सरकारी म्हणजे शेवटचा पर्याय” असं म्हणणाऱ्या शहरात आज परिस्थिती उलटली आहे—आता सरकारी रुग्णालय हेच पहिलं आणि विश्वासार्ह ठिकाण ठरत आहे!
रुग्णांना उत्तम सेवा देण्याच्या दृष्टीने आम्ही काम करत आहोत. आरोग्याच्या समस्या उद््भवूच नयेत, यासाठी शहरात ७९ आरोग्यवर्धिनी केंद्रांची उभारणी करत आहोत. त्यातील ६४ केंद्रांचे काम पूर्ण झाले आहे. येथे नवजात शिशू ते ज्येष्ठ नागरिकांपर्यंत १३ विविध आरोग्य सेवांचे संच आम्ही केलेले आहेत. त्याद्वारे प्रभावी सेवा देत आहोत.
– डॉ. अभय दादेवार, अतिरिक्त वैद्यकीय अधिकारी, वायसीएम रुग्णालय