महाराष्ट्र २४ ।। ऑनलाईन ।। विशेष प्रतिनिधी ।। दि. २९ एप्रिल २०२६ ।। मुंबई-पुणे प्रवास अधिक वेगवान आणि सुरक्षित करणाऱ्या Mumbai–Pune Expressway वरील ‘मिसिंग लिंक’ प्रकल्प अखेर सुरू होत असून १ मेपासून या मार्गावर वाहतूक सुरू होणार आहे. मुख्यमंत्री Devendra Fadnavis यांच्या हस्ते उद्घाटन होणाऱ्या या प्रकल्पामुळे घाटातील अवघड वळणे बायपास होणार आहेत. परिणामी प्रवासाचा वेळ तब्बल २० ते ३० मिनिटांनी कमी होणार असून, अपघातांचे प्रमाणही मोठ्या प्रमाणात घटण्याची अपेक्षा व्यक्त केली जात आहे.
सरकारकडून या नव्या मार्गासाठी स्पष्ट वेगमर्यादा निश्चित करण्यात आली आहे. ‘मिसिंग लिंक’वर हलक्या चारचाकी वाहनांसाठी ताशी १०० किमी वेगमर्यादा ठेवण्यात आली आहे, तर बस आणि इतर प्रवासी वाहनांसाठी ही मर्यादा ताशी ८० किमी असेल. विशेष म्हणजे बोगद्यांमध्येही हीच वेगमर्यादा लागू राहणार आहे. सुरुवातीच्या टप्प्यात केवळ हलकी वाहने आणि प्रवासी बसेस यांनाच प्रवेश दिला जाणार असून, मालवाहू वाहनांना तात्पुरती बंदी असेल.
हा प्रकल्प टप्प्याटप्प्याने लागू केला जाणार आहे. १ मे ते ३१ ऑक्टोबर २०२६ दरम्यान फक्त हलकी वाहने आणि बसेस चालतील. त्यानंतर परिस्थितीचा आढावा घेऊन नोव्हेंबरपासून मालवाहू वाहनांबाबत निर्णय घेतला जाईल. तसेच ज्वलनशील किंवा धोकादायक माल वाहून नेणाऱ्या वाहनांना पूर्णतः बंदी असणार आहे. सुमारे ६७०० कोटींच्या या प्रकल्पामुळे अंतर कमी होणार, इंधनाची बचत होणार आणि प्रदूषणातही घट होणार—म्हणजेच ‘वेग, सुरक्षितता आणि बचत’ यांचा तिहेरी फायदा प्रवाशांना मिळणार आहे.