विक्रमी उच्चांकानंतर बाजारात मोठी पडझड; खरेदीदारांसाठी सुवर्णसंधी, गुंतवणूकदार सावध
महाराष्ट्र २४ ।। ऑनलाईन ।। विशेष प्रतिनिधी ।। दि. ३१ मे २०२६ ।। Gold Rate : काही महिन्यांपूर्वी ज्या सोन्याने गुंतवणूकदारांना अक्षरशः सोन्याचे दिवस दाखवले होते, त्याच सोन्याची झळाळी आता काहीशी फिकी पडू लागली आहे. विक्रमी उंचीवर झेपावलेल्या सोने-चांदीच्या दरांनी आता उतरणीचा रस्ता धरल्याने सराफा बाजारात नव्या चर्चांना उधाण आले आहे. उच्चांक गाठताना दररोज नवे विक्रम नोंदवणारे मौल्यवान धातू आता घसरणीच्या भोवऱ्यात सापडले असून, बाजारातील समीकरणे वेगाने बदलताना दिसत आहेत. गेल्या काही दिवसांतील घसरणीमुळे गुंतवणूकदारांच्या चेहऱ्यावरील हास्य काहीसे ओसरले असले, तरी लग्नसराई आणि दागिने खरेदीची तयारी करणाऱ्यांसाठी ही बातमी दिलासादायक ठरत आहे.
इंडिया बुलियन अँड ज्वेलर्स असोसिएशनच्या आकडेवारीनुसार, २४ कॅरेट सोन्याच्या दरात आठवडाभरात तब्बल १,६५४ रुपयांची घसरण झाली आहे. एकेकाळी १.७६ लाख रुपयांच्या विक्रमी शिखरावर पोहोचलेले सोने आता १.५६ लाख रुपयांच्या आसपास आले आहे. म्हणजेच अवघ्या काही महिन्यांत सोन्याने तब्बल २० हजार रुपयांची घसरण अनुभवली आहे. चांदीची अवस्था तर आणखी नाट्यमय ठरली आहे. विक्रमी ३.८६ लाख रुपये प्रति किलोपर्यंत पोहोचलेली चांदी आता २.६३ लाख रुपयांवर घसरली आहे. म्हणजेच तब्बल १.२३ लाख रुपयांची पडझड! बाजारातील हा बदल अनेकांना अनपेक्षित वाटत असला, तरी त्यामागे जागतिक अर्थकारणाचे गुंतागुंतीचे धागेदोरे दडलेले आहेत.
मध्यपूर्वेतील तणाव, जागतिक आर्थिक अनिश्चितता आणि मोठ्या गुंतवणूकदारांकडून सुरू असलेली नफावसुली या घसरणीमागील प्रमुख कारणे मानली जात आहेत. सोन्या-चांदीच्या किमती विक्रमी पातळीवर पोहोचल्यानंतर मोठ्या गुंतवणूकदारांनी नफा खिशात टाकण्याचा मार्ग स्वीकारला. परिणामी बाजारात विक्रीचा दबाव वाढला आणि किमती खाली येऊ लागल्या. दुसरीकडे जागतिक स्तरावर अस्थिरता वाढल्याने अनेक गुंतवणूकदारांनी रोख रकमेवर भर देण्यास सुरुवात केली आहे. आर्थिक वादळाच्या शक्यतेत हातात रोकड असणे अधिक सुरक्षित मानले जात असल्याने मौल्यवान धातूंमधून निधी बाहेर पडताना दिसत आहे.
मात्र या घसरणीकडे केवळ नकारात्मक दृष्टीने पाहण्याचे कारण नाही. दागिने खरेदीची वाट पाहणाऱ्या ग्राहकांसाठी ही संधी सुवर्णमयी ठरू शकते. लग्नसराई, सण-उत्सव आणि गुंतवणुकीच्या दृष्टीने अनेकजण आता बाजाराकडे आशेने पाहत आहेत. मात्र स्वस्त दरांच्या मोहात अंधाधुंद खरेदी करण्याऐवजी प्रमाणित आणि हॉलमार्कयुक्त सोनेच घेणे आवश्यक आहे. बाजारात दर घसरतात, वाढतात; पण शुद्धतेशी तडजोड झाली तर नुकसान कायमचे ठरते. त्यामुळे किंमत जितकी महत्त्वाची, तितकीच विश्वासार्हताही महत्त्वाची आहे. सध्या सोन्याचा दर खाली आला असला, तरी त्याचे आकर्षण मात्र आजही अबाधित आहे.