महाराष्ट्र 24 -पिंपरी-चिंचवड, दि. 10 जुलै २०२६ : आषाढी वारीच्या पवित्र सोहळ्याच्या पार्श्वभूमीवर लाखो वारकऱ्यांच्या सेवेसाठी आणि स्वच्छ, सुंदर व पर्यावरणपूरक पालखी मार्ग उभारण्याच्या उद्देशाने पिंपरी-चिंचवड महानगरपालिकेच्या आवाहनाला उत्स्फूर्त प्रतिसाद देत संत निरंकारी मिशनने आळंदी ते बोपखेल या पालखी मार्गावर व्यापक स्वच्छता अभियान राबवून समाजासमोर सेवाभावाचा प्रेरणादायी आदर्श निर्माण केला. “स्वच्छता ही सेवा” हा केवळ संदेश न ठेवता तो प्रत्यक्ष कृतीत उतरवत मिशनच्या शेकडो सेवादल सदस्यांनी, स्वयंसेवकांनी तसेच महानगरपालिकेच्या अधिकारी व कर्मचाऱ्यांनी श्रमदानातून संपूर्ण परिसर स्वच्छ करण्याचा संकल्प यशस्वी केला. वारकरी संप्रदायाच्या पवित्र परंपरेला साजेसा स्वच्छ आणि सुरक्षित मार्ग उपलब्ध करून देण्यासाठी राबविण्यात आलेल्या या उपक्रमाचे नागरिकांनीही मनापासून स्वागत केले.
सद्गुरू माता सुदीक्षा जी महाराज आणि राजपिता रमित जी यांच्या प्रेरणेतून आयोजित करण्यात आलेल्या या अभियानात पालखी मार्गावरील रस्ते, पदपथ, सार्वजनिक ठिकाणे, बसथांबे आणि परिसरातील कचरा संकलित करून स्वच्छता करण्यात आली. भाविकांना कोणत्याही अडचणीशिवाय स्वच्छ वातावरणात पालखी सोहळ्याचा आनंद घेता यावा, तसेच पर्यावरण संवर्धनाचा संदेश समाजाच्या प्रत्येक घटकापर्यंत पोहोचावा, हा या अभियानामागील प्रमुख उद्देश होता. स्वच्छ परिसर म्हणजे निरोगी समाज आणि सेवाभाव म्हणजेच खरी ईश्वरभक्ती, या विचारांना कृतीची जोड देत स्वयंसेवकांनी अत्यंत शिस्तबद्ध आणि समर्पित भावनेने काम केले. या वेळी उपस्थित मान्यवरांनी संत निरंकारी मिशनच्या निःस्वार्थ सेवाभावाचे विशेष कौतुक करत, अध्यात्मासोबत सामाजिक उत्तरदायित्व जोपासणारे असे उपक्रम समाजात सकारात्मक परिवर्तन घडविण्यासाठी अत्यंत आवश्यक असल्याचे मत व्यक्त केले.
यावेळी संत निरंकारी मिशनचे पुणे झोनचे झोनल इन्चार्ज श्री अशोक अहुजा यांनी सांगितले की, सेवा, प्रेम, सहअस्तित्व आणि मानवतेचा संदेश प्रत्यक्ष कृतीतून समाजापर्यंत पोहोचविणे हेच मिशनचे मुख्य ध्येय आहे. रक्तदान, वृक्षारोपण, पर्यावरण संवर्धन, जलसंवर्धन, स्वच्छता अभियान तसेच विविध समाजोपयोगी उपक्रम देशभर सातत्याने राबवून मिशन सामाजिक परिवर्तनाची चळवळ अधिक व्यापक करत आहे. पालखी मार्गावरील हे स्वच्छता अभियानही त्याच सेवाभावाचा एक भाग असून, “सेवा हीच खरी उपासना” हा संदेश पुन्हा एकदा कृतीतून अधोरेखित करण्यात आला. धार्मिक परंपरा, सामाजिक बांधिलकी आणि पर्यावरण संरक्षण यांचा सुंदर संगम घडविणाऱ्या या उपक्रमाने वारकरी, नागरिक आणि प्रशासन यांच्यात समन्वयाचे एक आदर्श उदाहरण निर्माण केले असून, अशा सेवाभावी उपक्रमांमधूनच स्वच्छ, सुसंस्कृत आणि जबाबदार समाज घडण्याचा मार्ग अधिक भक्कम होत असल्याची भावना उपस्थितांनी व्यक्त केली.