१५ दिवस रेल्वेसेवा विस्कळीत; २५ गाड्यांचे मार्ग बदलणार, पुणेकरांनी प्रवासाआधी वेळापत्रक तपासणे बंधनकारक
महाराष्ट्र २४ ।। ऑनलाईन ।। विशेष प्रतिनिधी ।। दि. ४ सप्टेंबर २०२६ ।। गणपती बाप्पा मोरया म्हणत गावाकडे निघायचं आणि स्टेशनवर पोहोचल्यावर ‘गाडीच रद्द’ असं कळायचं, अशी वेळ पुणेकरांवर येऊ नये म्हणून ही बातमी आधीच वाचा. पुणे आणि हडपसर यार्डात हडपसर ते घोरपडी कोचिंग मेंटेनन्स कॉम्प्लेक्सदरम्यान तिसरी रेल्वे मार्गिका सुरू करण्यासाठी प्री-नॉन इंटरलॉकिंग आणि नॉन इंटरलॉकिंगची कामे हाती घेण्यात आली आहेत. त्यासाठी १९ सप्टेंबर ते ४ ऑक्टोबरदरम्यान विविध टप्प्यांत रेल्वे वाहतुकीवर परिणाम होणार आहे. उपलब्ध माहितीनुसार तब्बल ४२ गाड्या पूर्णपणे रद्द असून त्यांच्या ९८ फेऱ्यांवर परिणाम होईल. आणखी २५ गाड्यांचे मार्ग बदलले जाणार आहेत. म्हणजे गणेशोत्सवात बाप्पाला घरी आणण्याची लगबग आणि रेल्वेच्या वेळापत्रकाची कसरत, दोन्ही एकाच वेळी सुरू होणार आहे.
याशिवाय ३५ गाड्यांच्या प्रारंभिक किंवा अंतिम स्थानकात बदल करण्यात येणार असून, २२ गाड्यांचे नियमन आणि १४ गाड्यांच्या वेळापत्रकात फेरबदल होणार आहेत. पुणे-मुंबई, पुणे-सोलापूर, पुणे-नागपूर आणि पुणे-हावडा अशा महत्त्वाच्या मार्गांवरील प्रवाशांनी विशेष काळजी घ्यावी लागणार आहे. काही गाड्या पुण्याऐवजी खडकी, हडपसर किंवा दौंडपर्यंतच धावतील, तर काहींचे मार्ग वळवले जातील. त्यामुळे तिकीट हातात आहे म्हणजे प्रवास ठरला, अशी जुनी समजूत आता उपयोगाची नाही. गाडी कुठून सुटणार, कुठे थांबणार आणि किती उशिरा धावणार, हेही तपासावे लागणार आहे.
ब्लॉकचा पहिला महत्त्वाचा टप्पा १९ ते २३ सप्टेंबरदरम्यान आहे. या काळात पुणे-हडपसर अप आणि डाऊन मार्गावर दररोज दुपारी १२ ते सायंकाळी ५ या वेळेत काम होणार आहे. २४ सप्टेंबरनंतर ब्लॉकचा कालावधी कमी केला जाईल. ३ ऑक्टोबरला हडपसर यार्डात सकाळी ८ ते दुपारी ४पर्यंत काम होईल. तर ४ ऑक्टोबर हा निर्णायक दिवस असून मध्यरात्रीपासून सकाळी १०.३०पर्यंत मुख्य ब्लॉक आणि त्यानंतर सिग्नल व दूरसंचार यंत्रणेची कामे केली जाणार आहेत. रेल्वे प्रशासनाच्या मते ही कामे भविष्यातील रेल्वे वाहतूक अधिक सक्षम करण्यासाठी आवश्यक आहेत. पुणे परिसरातील तिसरी मार्गिका लांब पल्ल्याच्या आणि उपनगरीय वाहतुकीचे विभाजन करून क्षमता वाढवण्यासाठी महत्त्वाची ठरणार आहे.
गणेशोत्सवात रेल्वेवर प्रवाशांचा ताण आधीच वाढतो; त्यात १५ दिवसांचा हा मेगाब्लॉक म्हणजे प्रवाशांच्या संयमाची परीक्षा ठरणार आहे. मात्र विकासकामे थांबवण्यापेक्षा त्याचे नियोजन आणि माहिती स्पष्ट देणे महत्त्वाचे आहे. रेल्वेने प्रवाशांना प्रवासाआधी अद्ययावत वेळापत्रक तपासण्याचे आवाहन केले आहे. त्यामुळे घरातून निघण्यापूर्वी NTES किंवा रेल्वेच्या अधिकृत माहितीत आपली गाडी तपासा. कारण गणपतीच्या दिवसांत ‘बाप्पा मोरया’चा जयघोष हवा; ‘गाडी कुठे गेली?’ असा प्रवाशांचा आक्रोश नको. भविष्यातील रेल्वेचा वेग वाढवायचा असेल तर आजचा थोडा त्रास सहन करावा लागेल; पण हा त्रास नेमका किती आणि कोणाला, याची माहिती रेल्वेने वेळेवर दिली तर अर्धी कटकट तिथेच संपेल.