मुंबईत नायर रुग्णालयाच्या उपहारगृहाचा परवाना निलंबित; अकोल्यात 593 किलो कालबाह्य तूप जप्त, पुणे विभागात संशयास्पद अन्नसाठ्यावर मोठी कारवाई
महाराष्ट्र २४ ।। ऑनलाईन ।। विशेष प्रतिनिधी ।। दि. १९ सप्टेंबर २०२६ ।। सणासुदीच्या तोंडावर ताटात काय वाढले आहे, यापेक्षा ते सुरक्षित आहे का, हा प्रश्न अधिक महत्त्वाचा झाला आहे. महाराष्ट्र अन्न व औषध प्रशासनाने आयुक्त तुकाराम मुंढे यांच्या नेतृत्वाखाली अन्नसुरक्षेविरोधातील कारवाई तीव्र केली आहे. मुंबईतील नायर रुग्णालयाच्या कॅन्टीनवर अस्वच्छता आणि अन्नसुरक्षा नियमांचे उल्लंघन आढळल्यानंतर परवाना तातडीने निलंबित करण्यात आला. रुग्णालयाच्या आवारातील खाद्यगृहाकडूनच नियमांची पायमल्ली होत असेल, तर सामान्य हॉटेलवाल्यांकडून काय अपेक्षा ठेवायची, हा प्रश्न या कारवाईने उपस्थित केला आहे.
अकोल्यात 593 किलो कालबाह्य तूप सापडले. 16 सप्टेंबरला आदर्श कॉलनीतील पूर्वा मार्केटिंग येथे 458 किलो तूप, तर 17 सप्टेंबरला लिलाधर जगजीवन या आस्थापनातून 153 किलो प्रीमियम तूप जप्त करण्यात आले. दोन्ही कारवायांतील एकूण साठा 593 किलो आहे. संबंधित आस्थापनांविरोधात नियमानुसार पुढील प्रक्रिया सुरू आहे. कालबाह्य माल विक्रीसाठी ठेवण्याचा प्रकार ग्राहकांच्या आरोग्याशी थेट खेळ करणारा असल्याने तपासणी आणि प्रयोगशाळा अहवालानंतरची कारवाई महत्त्वाची ठरणार आहे.
पुणे विभागातही FDA ने 10 ते 15 सप्टेंबरदरम्यान विशेष मोहीम राबवली. पुणे, कोल्हापूर, सातारा आणि सांगली जिल्ह्यांतील 12 आस्थापनांमधून ₹56.36 लाखांचा संशयास्पद, भेसळयुक्त किंवा लेबलिंग त्रुटी असलेला अन्नसाठा जप्त करण्यात आला. याशिवाय 14 ठिकाणी कारवाई करून ₹20.26 लाखांचा गुटखा, पानमसाला आणि सुगंधित तंबाखू जप्त करण्यात आला. म्हणजे दोन स्वतंत्र मोहिमांत मिळून जप्तीची किंमत ₹76.62 लाखांवर जाते.
या कारवाईत खवा, पनीर, तूप, लोणी, मिठाई आणि दुग्धजन्य पदार्थांचा समावेश आहे. काही नाशवंत पदार्थ जागेवरच नष्ट करण्यात आले. दरम्यान, पुण्यात The New Poona Club चा परवाना गंभीर स्वच्छता त्रुटींमुळे निलंबित करण्यात आला. ग्राहकांनीही पॅकबंद पदार्थ घेताना उत्पादन तारीख, मुदत, लेबल आणि परवाना तपासणे गरजेचे आहे. कारण भेसळखोराला नफा दिसतो; पण त्याचा हिशेब शेवटी ग्राहकाच्या आरोग्याला चुकवावा लागू शकतो.