खड्डे, अनधिकृत पार्किंग आणि जड वाहनांच्या कोंडीवर समन्वित कृती आराखडा; जिल्हाधिकारी जितेंद्र डुडींचे विभागांना तातडीचे निर्देश
महाराष्ट्र २४ ।। ऑनलाईन ।। विशेष प्रतिनिधी ।। दि. १९ सप्टेंबर २०२६ ।। चाकणमध्ये रस्ता आहे की पार्किंगचा पट्टा, असा प्रश्न वाहनचालकांना रोज पडतो. त्यात खड्डे, जड वाहनांची गर्दी आणि चौकाचौकात अडकलेली वाहतूक यामुळे वेळ, इंधन आणि संयम तिन्हींची उधळपट्टी सुरू आहे. अखेर या प्रश्नावर प्रशासनाने समन्वित कृती आराखडा राबवण्याचा निर्णय घेतला आहे. पुणे जिल्हाधिकारी जितेंद्र डुडी यांच्या अध्यक्षतेखाली झालेल्या उच्चस्तरीय बैठकीत रस्ते दुरुस्तीपासून आधुनिक वाहतूक नियंत्रणापर्यंत विविध उपाययोजनांवर निर्देश देण्यात आले. बैठकीला आमदार बाबाजी काळे, निवासी उपजिल्हाधिकारी ज्योती कदम, PWD, MIDC, NHAI, वाहतूक पोलीस आणि स्थानिक प्रशासनाचे अधिकारी उपस्थित होते.
चाकण, तळेगाव, बोराटे वस्ती आणि भोसरीकडील जोडरस्त्यांवरील खड्डे तातडीने बुजवण्याचे आदेश देण्यात आले आहेत. PWDची रखडलेली कामे प्राधान्याने पूर्ण करण्याबरोबरच जिल्हा परिषदेच्या अखत्यारीतील रस्त्यांची पाहणी करून दुरुस्ती करण्याचेही निर्देश आहेत. चाकण-शिक्रापूर मार्गावरील कामांदरम्यान वाहतूक ठप्प होऊ नये म्हणून जड वाहनांसाठी पर्यायी मार्ग, तर आवश्यकतेनुसार हलक्या वाहनांसाठी एकेरी वाहतुकीचे नियोजन केले जाणार आहे. कामाच्या ठिकाणापूर्वी दिशादर्शक फलक लावण्याचीही योजना आहे.
या आराखड्यातील सर्वात चर्चेचा भाग म्हणजे AI आधारित वाहतूक नियंत्रण. प्रमुख चौकांवरील कॅमेऱ्यांच्या मदतीने नियमभंग करणाऱ्या वाहनांवर थेट कारवाई करण्याची योजना आहे. वाहतूक पोलिसांना स्थिर तसेच मोबाइल कॅमेरे उपलब्ध करून देण्याचा विचार आहे. चौकांचा स्वतंत्र तांत्रिक अभ्यास करून वाहतूक बेटे, भुयारी मार्ग आणि उन्नत पादचारी मार्ग यांसारख्या उपाययोजनांचाही विचार केला जाणार आहे.
अनधिकृत पार्किंगवरही आता कारवाईचा बडगा उगारला जाणार आहे. टोइंगसह दंडात्मक कारवाई केली जाईल, तर औद्योगिक कंपन्या आणि वाहतूक संघटनांनी स्वतःच्या वाहनांसाठी स्वतंत्र पार्किंगची व्यवस्था करावी, अशी भूमिका प्रशासनाने घेतली आहे. चाकणची कोंडी एका बैठकीने सुटणार नाही; पण किमान समस्या मान्य करून विभागांना जबाबदारी देण्यात आली आहे. आता खरी परीक्षा आदेशांची नाही, ते रस्त्यावर किती उतरतात याची आहे.