![]()
दिवसा उन्हाचा चटका, रात्री गारठा; बंगालच्या उपसागरात तीव्र चक्रीवादळाची निर्मिती, मात्र महाराष्ट्राला सध्या पावसाचा इशारा नाही
महाराष्ट्र २४ ।। ऑनलाईन ।। विशेष प्रतिनिधी ।। महाराष्ट्रात नोव्हेंबरच्या मध्यावर हवामानाने दुहेरी रंग दाखवायला सुरुवात केली आहे. दिवसा उन्हाचा चटका आणि रात्री-पहाटे बोचरा गारवा, अशा विचित्र वातावरणामुळे नागरिक हैराण झाले आहेत. भारतीय हवामानशास्त्र विभागाच्या १६ नोव्हेंबरच्या नोंदीनुसार, जेऊर येथे राज्यातील नीचांकी १२ अंश सेल्सिअस तापमानाची नोंद झाली. जळगाव १२.७, पुणे १३.५, नाशिक १४, सातारा १४ आणि यवतमाळ १४ अंशांवर होते. पुण्यात १७ नोव्हेंबरला कमाल तापमान ३१ अंश, तर किमान तापमान १३ अंशांच्या आसपास राहण्याचा अंदाज आहे. पुढील दोन दिवसांत राज्याच्या अंतर्गत भागातील किमान तापमानात आणखी एक ते दोन अंशांची घट होण्याची शक्यता आहे. मात्र याला सरसकट थंडीची लाट म्हणणे योग्य ठरणार नाही.
दरम्यान, बंगालच्या उपसागरात आणखी एका मोठ्या हवामान संकटाची चाहूल लागली आहे. दक्षिण-पूर्व आणि लगतच्या नैऋत्य बंगालच्या उपसागरातील तीव्र कमी दाबाचे क्षेत्र १६ नोव्हेंबरला चक्रीवादळात, तर १७ नोव्हेंबरला तीव्र चक्रीवादळात रूपांतरित होण्याची शक्यता भारतीय हवामान विभागाने वर्तवली आहे. १९ नोव्हेंबरच्या रात्रीपर्यंत हे वादळ आंध्र प्रदेशच्या किनारपट्टीजवळ पोहोचण्याचा अंदाज आहे. मात्र या वादळामुळे महाराष्ट्रात तातडीने मुसळधार पाऊस किंवा वादळी वाऱ्यांचा इशारा देण्यात आलेला नाही. कोकण, मध्य महाराष्ट्र आणि मराठवाड्यात हवामान प्रामुख्याने कोरडे राहण्याची शक्यता आहे. विदर्भात २० आणि २१ नोव्हेंबरला काही ठिकाणी हलक्या पावसाची शक्यता वर्तवण्यात आली आहे.
मुंबई, ठाणे, पालघर आणि रायगड परिसरात दिवसा उष्णता कायम राहणार असून पहाटे काही प्रमाणात गारवा जाणवेल. विदर्भातही सध्या कोरडे हवामान असून नागपूरचे किमान तापमान १४ ते १५ अंशांच्या आसपास राहण्याचा अंदाज आहे. विशेष म्हणजे, बंगालच्या उपसागरातील चक्रीवादळाची तीव्रता वाढत असली तरी त्याचा महाराष्ट्रावर थेट परिणाम होईल, असे सध्याच्या अधिकृत अंदाजातून स्पष्ट होत नाही. त्यामुळे अफवांवर विश्वास ठेवण्याऐवजी हवामान विभागाच्या अद्ययावत सूचनांकडे लक्ष देणे आवश्यक आहे. पहाटे आणि रात्री बाहेर पडताना उबदार कपडे वापरावेत. हवामानातील बदलांकडे दुर्लक्ष करू नका; पण प्रत्येक ढगामागे वादळ आणि प्रत्येक गारव्यामागे संकट शोधण्याचीही गरज नाही.
