महाराष्ट्र २४ – ऑनलाईन – विशेष प्रतिनिधी – दि. 2 नोव्हेंबर – सध्या जगभर कोविड १९ आजाराच्या कोरोन व्हायरसने थैमान घातल्यामुळे प्रशासनाने आरोग्य व्यवस्था सतर्क केलेली आहे. राज्यभर ठीकठिकाणी कोव्हीड १९ ची रुग्णालये सुरु करण्यात आलेली आहेत. परिणामी पिंपरी येथील वायसीएम अर्थात यशवंतराव चव्हाण स्मृती रुग्णालय कोव्हिड -१९ साठी राखीव करण्यात आले आहे. त्यामुळे इतर आजारांवरील उपचारासाठी शहरातील नागरिकांची कमालीची गैरसोय निर्माण झालेली आहे. त्यामुळे सर्वसामान्य रुग्णांना इतर आजारांवरील उपचारांसाठी यशवंतराव चव्हाण रुग्णालय खुले करावे, या मागणीचे निवेदन पिंपरी विधानसभेचे आमदार अण्णा बनसोडे यांनी महानगर पालिकेचे आयुक्त श्रावण हर्डीकर यांना दिले आहे.
सदर निवेदनामध्ये आमदार अण्णा बनसोडे यांनी म्हटले आहे कि, कोव्हीड-१९ मुळे शहरात झालेल्या मृत्यू व इतर आजारांच्या रुग्णांचे उपचार न मिळाल्यामुळे झालेले मृत्यू याची तुलना केल्याने कदाचित इतर विकारांमुळे मृत्यूची संख्या मोठ्या प्रमाणात असण्याची शक्यता नाकारता येत नाही. तसेच शहरातील नागरिकांना इतर विकारावरील उपचारासाठी खाजगी रुग्णालयाकडे जावे लागत असल्याने कमालीच्या आर्थिक अडचणींना सामोरे जावे लागत आहे.
परिणामी खर्चासाठी पैशानअभावी नागरिकांची कुचुंबना होत आहे. गरीब व गरजू रुग्णांना मोफत सवलतीच्या दारात उपचार देण्याची मनपाची जबाबदारी असताना शहरातील नागरिकांची गैरसोय होणे योग्य नसल्याने तातडीने यशवंतराव चव्हाण स्मृती रुग्णालय तातडीने पूर्ण क्षमतेने सुरु करण्यासाठी आवश्यक योग्य कार्यवाही करण्यात यावी, असेही या निवेदनात बनसोडे यांनी म्हटले आहे.