महाराष्ट्र २४ – ऑनलाईन – विशेष प्रतिनिधी – दि. १० नोव्हेंबर -पुणे – : शहरात शनिवार (ता. 7) आताच्या हिवाळ्यातील सर्वांत नीचांक तापमान नोंदविण्यात आल्यामुळे गेल्या दहा वर्षांमध्ये नोव्हेंबरच्या पहिल्याच आठवड्यातील सर्वाधिक कमी किमान तापमान असलेले हे यंदाचे दुसरे वर्ष ठरले. दरम्यान, पुढील सहा दिवसांमध्ये शहर आणि परिसरात किमान तापमानात काहीसा चढ-उतार होणार असल्याचा अंदाज हवामान खात्याने दिला. शिवाजीनगर येथील वेधशाळेत रविवारी सकाळी साडेआठ वाजेपर्यंत शहरात 14.6 अंश सेल्सिअस आणि लोहगाव येथे 17.4 अंश सेल्सिअस किमान तापमानाची नोंद झाली.
रविवारी राज्यात मध्य महाराष्ट्र व कोकण गोव्यातील काही भागांमध्ये किमान तापमानात सरासरीच्या तुलनेत किंचित वाढ झाल्याचे दिसून आले. मात्र विदर्भात सरासरीच्या तुलनेत किमान तापमानात उल्लेखनीय घट झाल्याचे रविवारी हवामान विभागामार्फत नोंदविण्यात आले. राज्यात सर्वाधिक कमी किमान तापमानाची नोंद चंद्रपूर येथे 10 अंश सेल्सिअस आणि सर्वाधिक कमाल तापमान सांताक्रूझ 35.8 अंश सेल्सिअस येथे झाली.
रविवारी विदर्भातील प्रमुख शहरातील किमान तापमानाचा पारा सरासरीपेक्षा सुमारे 3 ते 5 अंश सेल्सिअसने घसरले. त्यामुळे विदर्भातील थंडीचा कडाका वाढला आहे. तर, मध्य महाराष्ट्र आणि कोकणात सरासरीपेक्षा 1.6 ते 3 अंश सेल्सिअसने वाढ झाली होती.