महाराष्ट्र २४ । ऑनलाईन । विशेष प्रतिनिधी । नवीदिल्ली । दि. १३ मे । कोरोनाच्या या संकटकाळात देशभरातील शेतकऱ्यांसाठी एक आनंदाची बातमी आहे. प्रधानमंत्री किसान सन्मान निधी योजनेंतर्गत उद्या (शुक्रवार, १४ मे) आठवा हप्ता थेट शेतकऱ्यांच्या बँक खात्यात जमा होणार आहे. पंतप्रधान नरेंद्र मोदींच्या हस्ते सकाळी अकरा वाजता व्हिडिओ कॉन्फरन्सिंगद्वारे हा कार्यक्रम पार पडणार आहे. पंतप्रधान कार्यालयानं याबाबत माहिती दिली.
प्रधानमंत्री किसान सन्मान निधी योजनेंतर्गत उद्या १९,००० कोटींहून अधिक निधी ९.५ कोटी लाभार्थी शेतकरी कुटुंबांच्या खात्यात जमा केला जाणार आहे. यावेळी पंतप्रधान नरेंद्र मोदी स्वतः यातील काही लाभार्थी शेतकऱ्यांसोबत चर्चा करणार आहेत. यावेळी केंद्रीय कृषी मंत्री देखील उपस्थित असतील.
PM Modi will release the 8th instalment of financial benefit under Pradhan Mantri Kisan Samman Nidhi (PM-KISAN) scheme on 14th May at 11 AM via video conferencing. This will enable the transfer of more than Rs. 19,000 crores to more than 9.5 cr beneficiary farmer families: PMO pic.twitter.com/9uBDAF0UYO
— ANI (@ANI) May 13, 2021
दरम्यान, पीएम-किसान योजनेंतर्गत ६,००० रुपये प्रतिवर्ष आर्थिक मदत पात्र लाभार्थी शेतकरी कुटुंबांना देण्यात येणार आहे. ही रक्कम वर्षात चार महिन्यांच्या अंतराने तीन समान हप्त्यांमध्ये प्रत्येकी २,००० रुपये प्रमाणे वितरीत करण्यात येणार आहे. या आर्थिक मदतींची रक्कम थेट लाभार्थी शेतकऱ्यांच्या खात्यावर जमा केली जाणार आहे. या योजनेंतर्गत १.१५ लाख पेक्षा अधिक सन्मान निधी आत्तापर्यंत शेतकऱ्यांच्या खात्यात जमा करण्यात आले आहेत.