महाराष्ट्र 24 – मुंबई:
मुंबई महानगरपालिकेच्या आगामी निवडणुकीत राष्ट्रवादी काँग्रेसचे ५० ते ६० नगरसेवक निवडून आणण्याचा निर्धार उपमुख्यमंत्री अजित पवार यांनी व्यक्त केला. मुंबईत आयोजित केलेल्या मेळाव्यात ते बोलत होते. यावेळी त्यांनी महाविकासआघाडी मुंबई महानगरपालिकेची निवडणूक एकत्र लढणार असल्याचे सांगितले. लोकसभा निवडणुकीत काँग्रेस आणि आपल्याला मुंबईत एकही जागा मिळाली नाही.
विधानसभा निवडणुकीतही मुंबईत राष्ट्रवादी काँग्रेसकडून केवळ नवाब मलिक निवडून आले. मात्र, आगामी काळात ही परिस्थिती बदलायला पाहिजे. मुंबईतून राष्ट्रवादी काँग्रेसचे किमान १० आमदार निवडून आले पाहिजेत. तसेच सध्याच्या घडीला मुंबईत राष्ट्रवादी काँग्रेसचे ८ नगरसेवक आहेत. ही संख्या ५० ते ६० पर्यंत वाढली पाहिजे. त्यासाठी आतापासूनच कामाला लागा, असे आदेश अजित पवार यांनी कार्यकर्त्यांना दिले. आगामी काळात मुंबईत जम बसविण्याच्यादृष्टीने राष्ट्रवादी काँग्रेसने विशेष रणनीती आखली आहे. त्यानुसार राष्ट्रवादीचे मंत्री महिन्यातील एक दिवस मुंबईला देणार आहेत.