महाराष्ट्र २४ । विशेष प्रतिनिधी । दि. १४ नोव्हेबर । पुन्हा एकदा सोन्याच्या दरात वाढ होण्याचा ट्रेंड सुरू झाला आहे. लग्नसराईच्या हंगामात सोन्याचे भाव वाढणार असल्याचे कमोडिटी तज्ज्ञांचं म्हणणं आहे. अशा परिस्थितीत सोन्यात गुंतवणूक करण्याची ही योग्य संधी आहे की नाही हे जाणून घेणं महत्त्वाचं आहे. सोने ४९ हजार झाले असून लवकरच ते ५० हजारांवर जाण्याची शक्यता आहे.
ज्वेलर्सच्या म्हणण्यानुसार, या दिवाळीत सोन्याची मोठ्या प्रमाणात विक्री झाली. करोनाच्या काळात पहिल्यांदाच लोकांनी घराबाहेर पडून दिवाळीची खरेदी केली. किमती कमी असल्याने लग्नसराईच्या आधीच आगाऊ खरेदीला उधाण आलं आहे. त्यामुळे सोन्याचे भाव वाढण्याची प्रक्रिया सुरू झाली आहे. या व्यतिरिक्त, मूलभूत तत्त्वे देखील यावेळी किंमतीला समर्थन देत आहेत. दिवाळीनंतर लोक आता लग्नसराईसाठी खरेदीसाठी जात आहेत.
सीएआयटीच्या म्हणण्यानुसार, या दिवाळीत ७५ हजार कोटी रुपयांच्या सोन्याची विक्री झाली आहे. एकट्या दिल्लीत ९००० कोटी रुपयांचे सोने विकले गेले आहे. या दिवाळीत देशभरात सुमारे ४५ टन सोन्याची विक्री झाली आहे. हे प्री-कोविड पातळीपेक्षा ३५ टक्क्यांनी जास्त आहे. यावर्षी दिवाळीत ४५ टन सोन्याची विक्री झाली, तर २०१९ मध्ये ३० टन सोन्याची विक्री झाली.
ऑक्टोबर महिन्यात अमेरिकेत चलनवाढीचा दर तीन दशकांच्या उच्चांकावर पोहोचला, तर जपानमध्ये सध्या महागाईचा दर चार दशकांच्या उच्चांकावर आहे. सप्टेंबरच्या तुलनेत ऑक्टोबरमध्ये आपल्या देशात महागाई वाढली आहे. वाढत्या महागाईनेही गुंतवणूकदारांना सोन्याकडे आकर्षित केले आहे कारण ते महागाईविरूद्ध हेजिंग म्हणून काम करते. मागणी वाढल्यामुळे यावेळी सोन्या-चांदीत उसळी आहे. यावेळी चांदीने ३ महिन्यांचा उच्चांक गाठला आहे.
मोतीलाल ओसवाल फायनान्शिअलचे नवनीत दमानी यांनी दिलेल्या माहितीनुसार, जागतिक घटकांचा प्रभाव स्पष्टपणे दिसत आहे. अशा स्थितीत सोने ५२-५३ हजारांवर जाण्याची शक्यता आहे. विक्रीबद्दल बोलताना कामाख्या ज्वेल्सचे मनोज झा यांच्यानुसार, जानेवारी-मार्च तिमाहीत दरवर्षी साधारणपणे १५०-१८० टन सोन्याची विक्री होते. मात्र, या आर्थिक वर्षाच्या चौथ्या तिमाहीत २२५-२५० टन सोन्याची विक्री झाल्याचा अंदाज आहे.