महाराष्ट्र २४ । विशेष प्रतिनिधी । दि २७ जानेवारी । भारतात आपली इलेक्ट्रिक टू व्हीलर टोर्क क्राटोस स्टार्टअप कंपनीने लाँच केली आहे. टोर्क क्राटोसने भारतात दोन प्रकारात इलेक्ट्रिक बाईक लाँच केली आहे, क्राटोस आणि क्राटोस आर या नावाने या बाईक सादर करण्यात आल्या आहेत. स्पोर्टी लूक या मोटारसायकलींना देण्यात आला आहे. सुरुवातीची किंमत अनुदानानंतर १.०२ लाख रुपये आहे. ही किंमत दिल्लीच्या एक्स-शोरूमनुसार देण्यात आली आहे.
दरम्यान कंपनीने असा दावा केला आहे की, एका चार्जमध्ये ही इलेक्ट्रिक बाईक १८० किमीची रेंज देईल. कंपनीने दोन्ही व्हेरिएंटचे बुकिंग देखील सुरू केले आहे. कंपनीने डिलिव्हरीची माहिती देताना सांगितले की, डिलिव्हरी या वर्षी एप्रिलमध्ये केली जाईल. ही बाईक आजच ९९९ रुपयांमध्ये प्री-बुक करू शकता. या दोन्ही बाईकच्या किंमतीबद्दल सांगायचे झाले, तर दिल्लीमध्ये क्राटोसची किंमत अनुदानासह १,०२,४९९ रुपये आणि क्राटोस आरची किंमत १,१७,४९९ रुपये आहे. यामध्ये पांढरा, निळा, लाल आणि काळा रंगाचा पर्याय देण्यात आला आहे.
फक्त चार सेकंदात ही बाईक ०-४० किमी प्रतितास वेग पकडते. १०५ किमी/तास या इलेक्ट्रिक बाईकचा टॉप स्पीड आहे, एका चार्जमध्ये १८० किमीपर्यंत जाते. यात एक मजबूत बॅटरी आहे, जी ७.५ किलोवॅटची कमाल पॉवर आणि २८ एनएम टॉर्क जनरेट करू शकते. ही बाईक सुरुवातीच्या टप्प्यात दिल्ली, मुंबई, हैदराबाद, चेन्नई आणि पुणे यांसारख्या मोठ्या शहरांमध्ये लॉन्च केली जाईल. दुसऱ्या टप्प्यात आणखी शहरांचा समावेश केला जाईल, अशी माहिती कंपनीने दिली आहे.
या बाईकमध्ये फास्ट चार्जिंग ऑप्शन, जिओ फेन्सिंग आणि फाइंड माय व्हेईकल फीचर्स, मोटरवॉक असिस्टंट फीचर्स, क्रॅश अलर्ट, व्हेकेशन मोड आणि ट्रॅक मोड अॅनालिझ सारखी फीचर्स देण्यात आली आहेत. या बाईकमध्ये ४ किलोवॅट लिथियम आयन बॅटरी आहे, जी ४८ वॅटचा व्होल्टेज देते. ही इलेक्ट्रिक बाईक भारतीय बाजारपेठेत आधीपासून अस्तित्वात असलेल्या Revolt RV 400 (रु. १,१७,०२०), Joy E-Bike Monster (रु. १,०१,०५५) यांना टक्कर देईल. पण, या इलेक्ट्रिक बाईकमध्ये असे अनेक फिचर्स असून जे इतर इलेक्ट्रिक बाईकमध्ये नाहीत.