महाराष्ट्र २४ । विशेष प्रतिनिधी । दि.६ एप्रिल । ‘रशियाच्या हल्ल्याबाबत ताबडतोब कार्यवाही करा, किंवा स्वतःला पूर्णपणे विसर्जित करा’, असे कठोर आव्हान युक्रेनचे अध्यक्ष व्लाजिमिर झिल्येन्स्की यांनी संयुक्त राष्ट्रांच्या सुरक्षा परिषदेत केले. आपल्या देशावरील रशियाच्या आक्रमणाबाबत त्यांनी अतिशय तीव्र शब्दांत नाराजी व्यक्त केली. आम्ही रशियाच्या अत्याचाराचे शिकार ठरल्याचे सांगतानाच, मृतदेहांचा हृदयद्रावक व्हिडीओ त्यांनी यावेळी दाखवला.
व्हिडीओच्या माध्यमातून भाष्य करताना झिल्येन्स्की यांनी रशियाच्या सैनिकांवर दुसऱ्या जागतिक युद्धानंतरच्या सर्वांत भयावह अत्याचाराचा आरोप केला. हे सैनिक ‘इस्लामिक स्टेट’सारख्या दहशतवाद्यांपेक्षा वेगळे नसल्याचे सांगत त्यांनी रशियाच्या लष्कराला युद्धगुन्ह्यांसाठी तत्काळ न्यायालयीन कक्षेत आणण्याचे आवाहन संयुक्त राष्ट्रांना केले.
‘काल मी आमच्या बुचा शहरातून परतलो. किव्हपासून फार दूर नसलेले हे शहर नुकतेच रशियाच्या सैन्याच्या ताब्यातून मुक्त झाले. इथे असा एकही गुन्हा नाही, जो रशियाच्या सैनिकांने केलेला नाही. त्यांनी देशाची सेवा करणाऱ्या प्रत्येकाचा शोध घेऊन त्यांना हेतुपुरस्सर ठार मारले’, असा दावा झिल्येन्स्की यांनी सुरक्षा परिषदेतील आपल्या पहिल्या भाषणात केला. यामुळे रशियाच्या या अत्याचारामुळे जागतिक सुरक्षेची संपूर्ण रचनाच कमजोर होत आहे. त्यामुळे ते शिक्षेस पात्र आहेत. रशियाचे सैन्य आणि त्यांना आदेश देणाऱ्यांना युक्रेनमधील युद्धगुन्ह्यांसाठी त्वरित न्यायकक्षेत आणावे’, अशी मागणीही त्यांनी केली.
दरम्यान, युक्रेनच्या विविध भागांतील व विशेषत: बुचा येथील भयावह छायाचित्रांमुळे जगभरात संताप व्यक्त होत असून, रशियाविरुद्ध युद्धगुन्ह्यांसाठी खटला आणि कठोर निर्बंध लादण्याची मागणी होत आहे.
भाषण संपल्यानंतर झिल्येन्स्की यांनी सुरक्षा परिषदेत एक व्हिडीओ चालवण्यास सांगितले. यात रस्त्यावर पडलेले, जळलेले मृतदेह दिसत होते. यातील काहींचे हात पाठीमागे बांधलेले होते आणि तोंडही बांधलेले होते. त्यामध्ये मुलांचाही समावेश होता.