महाराष्ट्र २४ । विशेष प्रतिनिधी । दि. २० जुलै । राज्यात गेल्या काही दिवसांपासून सुरू असलेल्या राजकीय नाट्याच्या दृष्टीने आजचा दिवस महत्त्वपूर्ण ठरण्याची शक्यता आहे. कारण आज उद्धव ठाकरे यांच्या नेतृत्वाखालील शिवसेना व एकनाथ शिंदे यांच्या नेतृत्वाखालील गट यांच्यातील राजकीय धुमश्चक्री पुढे कोणते वळण घेणार, याबाबतची अतिशय महत्त्वाची सुनावणी आज सर्वोच्च न्यायालयात सरन्यायाधीश एन. व्ही. रमणा यांच्या नेतृत्वाखालील खंडपीठापुढे होणार आहे.
एकनाथ शिंदे गटातील बंडखोर आमदारांना अपात्र ठरवण्याची मागणी शिवसेनेने केली आहे, तर दुसरीकडे विधानसभा अध्यक्षांची निवड व सरकारवरील विश्वास ठरावाचेवेळी शिंदे गटाने जारी केलेला ‘व्हिप’ झुगारलेल्या शिवसेनेच्या आमदारांवर कारवाईची मागणी शिंदे गटाने केलेली आहे. या दोन्ही मागण्यांचे काय होते, कुणाचे पारडे न्यायालयात जड ठरते हे आजच्या सुनावणीत स्पष्ट होईल, अशी शक्यता आहे. त्यामुळे महाराष्ट्राचं लक्ष या सुनावणीकडे लागलं आहे.
शिवसेना पक्षप्रमुख उद्धव ठाकरे यांना आव्हान देत बंडखोरी केल्यानंतर एकनाथ शिंदे यांच्याकडून संपूर्ण पक्षच ताब्यात घेण्यासाठी हालचाली करण्यात येत आहे. विधानसभेतील दोन तृतीयांशपेक्षा अधिक खासदार आपल्याकडे खेचल्यानंतर आता संघटनेतील विविध पदाधिकाऱ्यांनाही आपल्या गोटात आणण्यासाठी शिंदे यांच्याकडून प्रयत्न सुरू आहेत. त्यामुळे शिवसेना कोणाची ही लढाई आगामी काळात न्यायालय आणि निवडणूक आयोगासमोर जाणार आहे. या दृष्टीने आपली बाजू भक्कम असावी यासाठी एकनाथ शिंदे हे उद्धव ठाकरेंना न जुमानता परस्पर पदाधिकाऱ्यांच्या नेमणुका करत आहेत. शिंदे यांच्या गटाने नुकतीच शिवसेनेच्या राष्ट्रीय कार्यकारिणीचीही घोषणा केली.
विधानसभेतील आमदारांच्या फुटीनंतर काल शिवसेनेच्या लोकसभेतील १८ पैकी १२ खासदारांनीही बंड पुकारत आपला वेगळा गट स्थापन केला. या गटाला लोकसभेच्या अध्यक्षांकडूनही मान्यता मिळाल्याने उद्धव ठाकरेंसाठी हा धक्का मानला जात आहे. या पार्श्वभूमीवर आज सुप्रीम कोर्टात होणारी सुनावणी महत्त्वाची ठरणार असून या सुनावणीत कोर्ट काय निर्देश देणार, हे पाहणं औत्सुक्याचं ठरणार आहे.