महाराष्ट्र २४ । विशेष प्रतिनिधी । दि .२४ सप्टेंबर । पुण्यात दारुड्या बापाने आपल्या ८ वर्षांच्या मुलीला गोळी घातल्याची ( Pune News Today ) धक्कादायक घटना घडली आहे. पुण्यातील नऱ्हे येथे शुक्रवारी रात्री ८ वाजण्याच्या सुमारास ही घटना घडली आहे. पांडुरंग तु. उभे (वय ३८) असे निर्दयी बापाचे नाव आहे.
पांडुरंग उभे हा बांधकाम व्यवसायिक आहे. त्यातूनच त्याच्याकडे परवाना असलेली बंदूक आहे. सध्या त्याचा व्यवसाय मंदीमध्ये असल्याने पांडुरंग आर्थिक अडचणीत आहे. त्यामुळे आधीच दारुचे व्यसन असलेल्या उभचे दारू पिण्याचे प्रमाण वाढले होते. शुक्रवारी रात्री तो दारू पिऊन घरी आला. त्यावरून त्याच्यामध्ये आणि पत्नीमध्ये कडाक्याचे भांडण झाले. तुमच्यामुळे मला बाहेरच्या लोकांचा मार खावा लागतो. आज तुम्हाला संपवून टाकतो, असं म्हणत उभे याने आपली परवाना असलेली बंदूक पत्नीच्या दिशेने रोखली.
आई-वडिलांमध्ये कडाक्याचे भांडण सुरू असल्याचे पाहून जवळच उभी असलेली ८ वर्षाची राजनंदिनी ओरडतमध्ये आली. ‘पप्पा मम्मीला मारू नका’ अशी विनवणी राजनंदिनी करत होती. मात्र दारुच्या नशेत धुंद असलेल्या निर्दयी बापाने कसलीही दया न दाखवता थेट राजनंदिनीवर गोळी झाडली. यात राजनंदिनी गंभीर जखमी झाली असून तिला जवळच्या खासगी रुग्णालयात दाखल करण्यात आले आहे. नराधम बापाच्या विरोधात सिंहगड पोलीस ठाण्यात गुन्हा दाखल करण्यात आला आहे. त्याला पोलिसांनी अटकही केली आहे.
परिमंडळ तीनच्या पोलीस आयुक्त पौर्णिमा गायकवाड यांच्या मार्गदर्शनाखाली सहाय्यक पोलीस आयुक्त रुक्मिणी गलांडे, पोलीस निरीक्षक शैलेश संखे, जयंत राजुरकर, सहाय्यक पोलीस निरीक्षक राहुल यादव, प्रवीण जाधव, पोलीस उपनिरीक्षक सचिन निकम, अस्मिता लाड, अशोक सणस हे माहिती मिळताच तातडीने घटनास्थळी दाखल झाले होते.