महाराष्ट्र २४ । विशेष प्रतिनिधी । दि .१६ ऑक्टोबर । दिवाळीची सुट्टी गोव्यात घालवण्याचा प्लान करणाऱ्या मद्यप्रेमींसाठी एक महत्त्वाची बातमी आहे. गोवामध्ये आता बीअर महागणार आहे. राज्य सरकारने बिअरवरील अबकारी कर वाढवल्याने आता बीअरची किंमत १० ते १२ रुपये प्रती लिटरने वाढली आहे. राज्याच्या अबकारी विभागाने शुल्क वाढीची घोषणा दोन दिवसांपूर्वी केली होती.
अबकारी कर वाढवल्याने प्रती लिटर घाऊक बिअरमागे १० रुपये अधिक मोजावे लागणार आहेत. म्हणजेच लाइट बिअरच्या प्रति लिटरमागे १५ रुपये तर स्ट्रॉंग बिअर प्रती लिटरमागे २०-२५ रुपयांची वाढ झाली आहे, असं मद्य विक्रेते संघटनेचे अध्यक्षांनी म्हटलं आहे. गोव्यात मद्याला अधिक मागणी आहे. समुद्रकिनारा आणि बिअर असं कॉम्बिनेशन पर्यटकांना नेहमीच खुणावत असतं. स्वस्त दरात मिळणाऱ्या मद्यामुळं अनेक पर्यटक राज्यात येत असतात. सरकारलाही यातून मोठं उत्पन्न मिळत असते. पण आता गोव्यात बिअरचे दर वाढणार असल्याने तळीरामांना आता अधिक शुल्क मोजावे लागणार आहेत.
गोवा सरकारने यापूर्वीच मद्यावरील अबकारी कर वाढवणार असल्याचे संकेत दिले होते. त्यानुसार आता बीअरवरील कर वाढवण्यात आला आहे. अबकारी कर वाढल्याने स्वस्त बिअर विक्री करणारे राज्य हे गोव्याचं नाव आता मागे पडले आहे. विदेशी मद्य विक्रीबाबतही गोव्यातील अर्ध्याहून अधिक बाजारपेठ उत्तर भारतीय राज्यांत गेले आहे, अशी खंत इथल्या मद्य विक्रेत्यांनी केली आहे.
संपूर्ण भारत भरातून गोव्यात पर्यटक येतात. यापूर्वी पर्यटक गोव्यातूनच मद्य विकत घ्यायचे. मात्र, आता पर्यटक येताना मद्यही विकत घेऊन येत आहेत. विदेशी दारूबाबत गोवा आता महाग झाल्याची त्याची तक्रार आहे. दारू व्यापाऱ्यांच्या म्हणण्यानुसार, गेल्या दोन महिन्यांपासून दारूच्या विक्रीत मोठी घट झाली आहे. जर सरकारने दारुविक्रीबाबत ठोस पावलं उचलली नाहीत परिस्थिती अजून खराब होऊ शकते.