महाराष्ट्र २४ – ऑनलाईन – बीड – विशेष प्रतिनिधी – संजय वीर – केज तालुक्यातील केळगाव येथे कोरोना विषाणूची लागण झालेला रुग्ण आढळून आला आहे. बीड जिल्ह्यात इतर ठिकाणी कोरोना विषाणूचा प्रादुर्भाव होऊ नये म्हणून पुढीलप्रमाणे गावे कन्टेनमेंट आणि बफर झोन म्हणून घोषित करण्यात आले. फौजदारी प्रक्रिया दंड संहिता १९७३ कलम १४४ नुसार केज तालुक्यातील केळगाव गावासह ३ किमी. परिसरातील केळगाव, बेलगाव, अरणगाव, सांगवी हा परिसर कन्टेनमेंट झोन (Containment zone) म्हणून (दि. १९ रोजी) घोषित करण्यात येत आहे, असे आदेश जिल्हाधिकारी राहुल रेखावार यांनी दिले आहेत.
तसेच त्यापुढील ४ किमी. परिसरातील केज तालुक्यातील हनुमंत प्रिंपी, माळेवाडी, एकुरका, मस्साजोग, जाधवजवळा, काळेगावघाट, सारणी , पिंपळगाव व कोरेगाव ही गावे बफर झोन (Buffer zone) म्हणून घोषित करण्यात येत आहेत. ही सर्व गावे व परिसर पुढील अनिश्चित कालावधीसाठी पूर्णवेळ बंद करण्यात येऊन संचारबंदी लागू करण्यात येत आहे.
राज्य सरकारने लॉकडाऊनचा कालावधी ३१ मे २०२० पर्यंत वाढविला असल्याने त्या अनुषंगाने जिल्ह्यात दिनांक ३१ मे २०२० रोजीचे रात्री १२ वाजेपर्यंत फौजदारी प्रक्रिया दंड संहिताचे कलम १४४ (१)(३) लागू करण्यात आले आहेत. तसेच यापूर्वी या कार्यालयाने वेळोवेळी निर्गमित केलेले आदेश, सुधारीत आदेश, सुधारणा आदेश या आदेशासह अंमलात राहतील.