महाराष्ट्र २४ । विशेष प्रतिनिधी । दि. ७ जुन । कुस्ती संघटनेचे माजी अध्यक्ष बृजभूषण शरण सिंह यांच्याविरोधात आंदोलन करणाऱ्या कुस्तीपटूंशी केंद्र सरकार पुन्हा एकदा चर्चा करण्यास तयार आहे. केंद्रीय क्रीडा मंत्री अनुराग ठाकूर यांनी मंगळवारी रात्री उशिरा ट्विट करून ही माहिती दिली. सरकार पैलवानांशी त्यांच्या प्रश्नांवर चर्चा करण्यास उत्सुक आहे, असे ते म्हणाले. मी त्यांना पुन्हा एकदा चर्चेसाठी बोलावले आहे.
याआधी कुस्तीपटूंनी 4 जूनच्या रात्री गृहमंत्री अमित शहा यांची भेट घेतली होती. क्रीडा मंत्री अनुराग ठाकूर आणि कुस्तीपटूंमध्ये सहा महिन्यांपूर्वी २४ जानेवारीला पहिली चर्चा झाली होती. यानंतर पैलवानांनी आंदोलन मागे घेतले.
दुसरीकडे, दिल्ली पोलिस मंगळवारी बृजभूषण शरण सिंह यांच्या लखनऊ आणि गोंडा येथील निवासस्थानी पोहोचले. बृजभूषणच्या 15 कर्मचाऱ्यांची पोलिसांनी चौकशी केली. यामध्ये चालक, सुरक्षा कर्मचारी, माळी आणि नोकरांचा समावेश होता.गृहमंत्री अमित शहा यांच्यासोबतच्या भेटीबाबत कुस्तीपटू बजरंग पुनिया म्हणाला की, अमित शहा यांच्यासोबत झालेल्या बैठकीत आम्हाला याविषयी बाहेर बोलू नका, असे सांगण्यात आले होते. या गोष्टी सरकारकडून आम्हाला सांगितल्या होत्या असे बजरंग म्हणाला.
एनडीटीव्हीला बोलताना त्याने सांगितले – आमची गृहमंत्र्यांसोबत कोणतीही सेटिंग नाही. आमचे आंदोलन सुरूच राहील. आम्ही त्यांना विचारले की बृजभूषण यांना अटक का झाली नाही? त्यावर गृहमंत्र्यांनी चौकशी सुरू असल्याचे सांगितले होते.