महाराष्ट्र २४ । विशेष प्रतिनिधी । दि. १ ऑगस्ट । आज १ ऑगस्ट आहे म्हणजे नवीन महिना सुरू झाला आहे आणि महिन्याच्या पहिल्याच दिवसापासून अनेक महत्त्वाचे बदल झाले आहेत ज्याचा थेट परिणाम तुमच्या खिशावर होणार आहे. उदाहरणार्थ, आयकर रिटर्न भरण्यासाठी तुम्हाला आता दंड भरावा लागेल त्याचबरोबर, जर तुम्ही व्यावसायिक एलपीजी सिलिंडर ग्राहक असाल तर तुम्हाला पहिल्या दिवशी मोठा दिलासा मिळाला आहे. अशाच महिन्याच्या पहिल्या दिवशी झालेल्या मोठ्या बदलांबद्दल जाणून घेऊ या.
आता ITR फाईलवर दंड भरावा लागणार
गेल्या आर्थिक वर्षाच्या कमाईची माहिती देऊन ITR दाखल कार्याची अंतिम तारीख ३१ जुलै होती. त्यामुळे तुम्ही कोणत्या कारणामुळे दिलेल्या मुदतीत आयकर रिटर्न दाखल केला नसेल तर तुम्हाला १ ऑगस्टपासून दंडासह विलंबित ITR भरण्याची संधी आहे. विलंबित आयकर भरण्यासाठी करदात्यांना किमान १ हजार ते पाच हजार रुपयांपर्यंत दंड भरवा लागेल.
व्यावसायिक गॅस सिलिंडरच्या दरात कपात
पेट्रोलियम कंपन्यांनी १ ऑगस्ट रोजी व्यावसायिक गॅस सिलिंडरच्या दरात १०० रुपयांची कपात केली आहे, मात्र घरगुती सिलिंडरच्या दरात कोणताही बदल केलेला नाही. अशा स्थितीत आजपासून व्यावसायिक सिलिंडरच्या ग्राहकांना कमी किमतीत गॅस उपलब्ध होईल.
SBI अमृत कलश योजना
जर तुम्ही भारतीय स्टेट बँकेच्या अमृत कलश योजनेत गुंतवणूक करण्याचा विचार करत असाल, तर तुमच्याकडे शेवटची संधी आहे. या योजनेअंतर्गत सर्वसामान्य ग्राहकांना ४०० दिवसांच्या एफडीवर ७.१ टक्के व्याज मिळत आहे. त्याचबरोबर ज्येष्ठ नागरिकांना ७.६ टक्के व्याज मिळत आहे. तुमच्याकडे त्यात गुंतवणूक करण्यासाठी १५ ऑगस्ट २०२३ पर्यंत वेळ आहे.
ॲक्सिस बँक क्रेडिट कार्ड
ॲक्सिस बँकेच्या क्रेडिट वापरकर्त्यांसाठी एक महत्त्वाची बातमी आहे. फ्लिपकार्टवर बँकेच्या कार्डच्या वापरावर ग्राहकांना १.५% कॅशबॅक मिळत होता, जो १२ ऑगस्टनंतर मिळणार नाही.
नवीन GST नियम
GST मार्गदर्शक तत्त्वांनुसार B2B व्यवहार मूल्य पाच कोटी रुपये असलेल्या कंपन्यांसाठी इलेक्ट्रॉनिक इन्व्हॉईस तयार करणे अनिवार्य असेल. यापूर्वी, १० कोटी रुपये किंवा त्याहून अधिक वार्षिक उत्पन्न असलेल्या कंपन्यांना ई-इनव्हॉइस तयार करणे बंधनकारक होते.