महाराष्ट्र २४ । विशेष प्रतिनिधी । दि. २२ ऑगस्ट । हिंजवडीसह माण, मारुंजी, जांबे, नेरे, सांगवडे आणि गहुंजे या सात गावांचा पिंपरी-चिंचवड महापालिकेत समावेश करण्यास राज्य सरकारने अनुकूलता दर्शविली आहे. त्यामुळे गेल्या आठ वर्षांपासून प्रलंबित विषय मार्गी लागण्यास मदत होणार आहे.
हिंजवडीसह सात गावांच्या पालिकेतील समावेशाबाबत मावळचे खासदार श्रीरंग बारणे यांनी मुख्यमंत्री एकनाथ शिंदे यांची प्रत्यक्ष भेट घेऊन आग्रह धरला आणि याबाबतची भूमिका स्पष्ट केली. आयटी नगरी असलेल्या हिंजवडीचे नागरीकरण झपाट्याने होत आहे. त्या तुलनेत विकास झालेला नाही. पाणी, रस्ते, वीज, सांडपाणी या मूलभूत सुविधांचा अभाव आहे, या मुद्द्याकडे बारणे यांनी सरकारचे लक्ष वेधले.
‘हिंजवडी, माण क्षेत्रात अनेक नामांकित आयटी कंपन्या आहेत. अनेकांची कार्यालये आहेत. त्यामध्ये काम करणाऱ्या कुशल कामगारांची संख्याही मोठी आहे. देशाच्या कानाकोपऱ्यातून नागरिक वास्तव्यास आहेत; परंतु त्यांना मूलभूत सुविधांअभावी अनेक अडचणींचा सामना करावा लागत आहे. गहुंजे येथे आंतरराष्ट्रीय दर्जाचे क्रिकेट स्टेडियम आहे. मात्र, या गावात अद्यापही सांडपाणी प्रक्रिया प्रकल्प पुरेसे नाही. त्यामुळे अशुद्ध पाणी थेट नदीपात्रात सोडले जाते. नदीचे प्रदूषण वाढले आहे. या गंभीर मुद्याकडे सरकारने लक्ष देणे आवश्यक आहे,’ अशी भूमिका घेतल्याचे बारणे यांनी स्पष्ट केले.
वाढत्या लोकसंख्येमुळे ग्रामपंचायतींना नागरी सुविधा देणे शक्य होत नाही. सुविधांसाठी गावांचा समावेश पालिकेत करावा, अशी नागरिकांची मागणी आहे. मुळशी तालुक्यातील ही सात गावे पालिकेच्या नजीक आहेत. त्यांचा पालिकेच्या हद्दीत समावेश झाल्यास झपाट्याने विकास होऊ शकेल, असा दावा बारणे यांनी केला आहे. त्यावर सकारात्मक निर्णय घेण्याचे आश्वासन मुख्यमंत्री शिंदे यांनी दिल्याचे त्यांनी स्पष्ट केले.
प्रस्ताव २०१५पासून प्रलंबित
हिंजवडीसह सात गावांचा समावेश पिंपरी-चिंचवड महापालिकेत करण्याचा प्रस्ताव पालिकेच्या सभेत फेब्रुवारी २०१५मध्ये मंजूर करण्यात आला. त्यानंतर तो मंजुरीसाठी जून २०१५मध्ये सरकारकडे पाठविण्यात आला. मात्र, अद्यापपर्यंत निर्णय झाला नाही. त्यानंतर २०२०मध्ये पुणे पालिकेची हद्दवाढ झाली. मात्र, पिंपरी-चिंचवडचा प्रस्ताव प्रलंबितच आहे. त्याबाबत निर्णयाची प्रतीक्षा आहे.
हद्दवाढीचे टप्पे – वर्ष
– चार ग्रामपंचायती मिळून नगरपालिका – १९७०
– नऊ गावांच्या समावेशासह महापालिका – १९८२
– नवीन १८ गावांचा पालिकेत समावेश – १९९७
– ताथवडे गावचा पालिकेत समावेश – २००९
– हद्दवाढीचा प्रस्ताव सरकारला सादर – २०१५
गावांचा विकास आणि नागरिकांना सोयी सुविधा मिळण्याच्या अनुषंगाने हिंजवडी, माणसह सात गावे पालिकेत असणे गरजेचे आहे. त्यामुळे अनधिकृत बांधकामांना आळा बसण्यास मदत होणार आहे. गावे समावेशाबाबत सकारात्मक विचार करून लवकरच निर्णय घेतला जाईल, असे आश्वासन मुख्यमंत्री एकनाथ शिंदे यांनी दिले आहे.
– श्रीरंग बारणे, खासदार