महाराष्ट्र २४ ।। विशेष प्रतिनिधी ।। दि. २९ जुन ।। सोलापूर शहरालगत असलेल्या मार्केट यार्ड परिसरात एफडीएने किडकी सुपारीची वाहने जप्त करत मोठी कारवाई केली आहे. अन्न व औषध विभागाच्या अधिकाऱ्यांनी तीन मालवाहतूक करणारी वाहने ताब्यात घेऊन लाखो रुपयांची सुपारी जप्त केली आहे. कर्नाटक राज्यातून किडकी सुपारी सोलापुरात आयात करण्यात आली होती. एफडीएच्या अधिकाऱ्यांनी सर्व मुद्देमाल जप्त केला असून काही नमुने प्रयोगशाळेकडे उत्तरीय तपासणीसाठी पाठवले असल्याची माहिती रेणुका पाटील या अधिकारींनी दिली आहे. प्रयोगशाळेचा अहवाल आल्यानंतर संबंधित व्यापाऱ्यावर कारवाई केली जाणार आहे.
लाखो रुपयांची सुपारी जप्त
अन्न व औषध प्रशासनाच्या अधिकाऱ्यांचा भरारी पथक वेगवेगळ्या ठिकाणी छापेमारी करत आहे. २७ जून २०२४ रोजी विशेष भरारी पथकातील अन्न सुरक्षा अधिकारी मंगेश लवटे यांना खबऱ्याने गोपनीय माहिती दिली होती. मिळालेल्या माहितीच्या आधारे सोलापूर मार्केट यार्ड चौकामध्ये अशोक लेलंड वाहन क्र. KA-१४, C- ७५१५, KA-१४, C-०८५० व KA-१४, C-४६१९ या वाहनाची तपासणी करण्यात आली. वाहनांत रंग मिश्रीत व किटकबाधीत सुपारीची वाहतूक होत असल्याचे आढळून आले.
भरारी पथकाची कारवाई
सोलापूर एफडीएच्या अधिकाऱ्यांनी दिलेल्या माहितीनुसार, महिला अधिकारी रेणुका पाटील यांनी किटकबाधीत व रंग मिश्रीत सुपारी या अन्न पदार्थाचे नमुने घेऊन, उर्वरित ७३ हजार ४९४ किलो किंमतीचे ७६ लाख ४३ हजार ३७ रुपयाचा साठा कमी दर्जाच्या संशयावरून, जप्त करून ताब्यात घेतला आहे.
किडकी सुपारी प्रकरणात अन्न सुरक्षा व मानदे कायद्यांतर्गत पुढील कारवाई सुरू आहे. सदरची कारवाई विशेष भरारी पथकाचे सहाय्यक आयुक्त देसाई, अन्न सुरक्षा अधिकारी मंगेश लवटे, उमेश भुसे व रेणुका पाटील तसेच नमुना सहाय्यक श्रीशैल हिटनळ्ळी, यांच्या पथकाने केली.