महाराष्ट्र २४ ।। विशेष प्रतिनिधी ।। दि. २ सप्टेंबर ।। वनराज आंदेकर हत्या प्रकरणात एक धक्कादायक खुलासा झाला आहे. काल शहराच्या मध्यभागी वनराज आंदेकरची हत्या करण्यात आली, आणि या हत्येच्या आरोपांमध्ये आता त्याच्या बहिणी आणि जावयाचे नाव समोर आले आहे. वनराज आंदेकरच्या वडिलांनी हा गंभीर आरोप करत दावा केला आहे की, या हत्येच्या कटात त्याच्या बहिणी आणि जावयाचा हात आहे. १३ जणांच्या टोळक्याने ही हत्या केली असून या प्रकरणामुळे शहरात खळबळ उडाली आहे.
वनराज आंदेकर याच्या वडिलांनी समर्थ पोलीस ठाण्यात दिलेल्या फिर्यादीवरून, त्यांच्याच दोन मुलींनी आणि दोन जावयांच्या सांगण्यावरून हे कृत्य केलं आहे. आत्तापर्यंत १० आरोपी निष्पन्न झाले असून ४ जणांना ताब्यात घेण्यात आलं आहे. पोलिसांनी दिलेल्या माहितीनुसार, कौटुंबिक आणि संपत्तीच्या वादावरून हा खून करण्यात आला असल्याचे सांगण्यात येत आहे.
वनराज आंदेकर हे पुणे महानगरपालिकेतील राष्ट्रवादी काँग्रेसचे माजी नगरसेवक होते. २०१७ मध्ये झालेल्या निवडणुकीत ते निवडून आले होते. त्यांच्या आधी त्यांच्या आई राजश्री आंदेकर आणि चुलत भाऊ उदयकांत आंदेकर हे देखील नगरसेवक होते. वत्सला आंदेकर, वनराज यांच्या कुंटुबातील एक महिला, पुणे शहराच्या महापौर म्हणूनही कार्यरत होत्या. आंदेकर कुटुंबाचा पुण्यातील राजकारणात आणि गुन्हेगारी विश्वात मोठा प्रभाव आहे.