महाराष्ट्र २४ ।। विशेष प्रतिनिधी ।। दि. १४ सप्टेंबर ।। सतत गेली वीस वर्ष महाराष्ट्रच नव्हे, तर मराठी माणूस जिथे जिथे पोहोचला आहे, तिथल्या महिला वर्गाच्या मनावर अधिराज्य गाजवणारा एकमेव मराठी कार्यक्रम म्हणजे होम मिनिस्टर. आदेश बांदेकर यांनी कधी लाडका दीर होऊन भावनिक आधार दिला, तर प्रसंगी त्याच वहिनीची फिरकी घेत चेहऱ्यावर हास्याची लकेर उमटवली. १३ सप्टेंबर २००४ रोजी अवघ्या १३ भागांसाठी सुरु झालेला ‘झी मराठी’ वाहिनीवरील ‘होम मिनिस्टर’ कार्यक्रमाचा प्रवास तब्बल वीस वर्षांनी थांबला. या काळात सहा हजारांहून अधिक भाग प्रक्षेपित झाले. संध्याकाळी साडेसात, मग साडेसहा, तर कधी सहा अशी कार्यक्रमाची वेळ अनेकदा बदलली, मात्र महिला वर्गाने भावोजींची साथ कधीच सोडली नाही. शेवटच्या भागात आदेश भावोजींचा आवाज कातर झाल्याचं अनेकांनी अनुभवलं.
आदेश बांदेकर काय म्हणाले?
१३ सप्टेंबर २००४ मध्ये ‘दार उघड बये दार उघड’ असं म्हणत महाराष्ट्रातील घराघराच्या दरवाजावर थाप पडली. आणि आनंदाची यात्रा झी मराठीने सुरु केली. घराघरातील स्त्रियांचा सन्मान करत आलो… या प्रवासात खूप आनंदाचे, सुखाचे क्षण आले. आज १३ सप्टेंबर २०२४ रोजी या कार्यक्रमाला २० वर्ष पूर्ण होत आहेत. हा खूप मोठा प्रवास होता. पण अत्यंत आनंदात, आपला कार्यक्रम म्हणून, किंबहुना आपल्या कुटुंबाचा सदस्य म्हणून घराघरातून आम्हाला स्वीकारण्यात आलं, याबद्दल आदेश बांदेकर यांनी कार्यक्रमाच्या सुरुवातीला आभार व्यक्त केले.
महाराष्ट्राच्या घराघराने आम्हाला आशीर्वाद दिला आणि हा प्रवास कधीही न थांबता वेगाने सुरु झाला. या प्रवासात अनेक कुटुंब जोडता आली, आनंदाचे क्षण मिळाले. देवदर्शनही घडलं, गणपती येताच अष्टविनायकाची यात्रा झाली, कोकणच नाही तर विदर्भातील बाप्पांचंही दर्शन घेतलं.
नवरात्रात साडेतीन शक्तिपीठांसह घरबसल्या प्रेक्षकांना देवीचं दर्शन घडवता आलं. दिवाळी, १५ ऑगस्ट, २६ जानेवारी, दहीहंडी प्रत्येक आनंदाचा क्षण साजरा केला. आषाढी वारी तर कधीच चुकली नाही, कधी दिवेघाटात होतो, तर कधी माऊलींच्या पायावर नतमस्तक झालो, तुकोबा रायांच्या चरणी सुखाची प्रार्थना केली. अक्कलकोटला स्वामी समर्थांना चाफ्याची फुलं वाहून झी मराठीचं रुपडं पालटलं, अशा आठवणी आदेश बांदेकर शेवटाकडे जाताना सांगत होते.
घर, कुटुंब, लहानथोरांप्रती आदर व्यक्त करणारा, घराघरातील स्त्री शक्तीचा सन्मान करणारा हा कार्यक्रम. तुम्ही प्रेम केलंत, त्यासाठी मी नतमस्तक होतो. सगळ्यांचं सगळं चांगलं होवो, असं मागणं घातलं. होम मिनिस्टरचा प्रवास कायमच ऊर्जा देणारा. स्त्री शक्तीकडून आशीर्वाद देणारा होता. त्यासाठी मी कायमच तुमचा आभारी राहीन, अशा भावना आदेश बांदेकर यांनी व्यक्त केल्या.