महाराष्ट्र २४ ।। विशेष प्रतिनिधी ।। दि. ११ नोव्हेंबर ।। ‘स्वाभिमानी महाराष्ट्र लाचारांच्या हातात देऊ नका,’’ असे आवाहन राष्ट्रवादी काँग्रेस शरदचंद्र पवार पक्षाचे नेते शरद पवार यांनी केले. तसेच ‘मी काय म्हातारा झालोय का? हे सरकार बदलल्याशिवाय मी म्हातारा होणार नाही. शांत बसणार नाही’, असा स्पष्ट इशारा पवार यांनी महायुतीला दिला.
विधानसभा निवडणुकीच्या प्रचारार्थ आज परांडा (जि. धाराशिव) येथील सभेत ते बोलत होते. पवार म्हणाले, की राज्याची सत्ता ज्यांच्या हातात आहे, त्यात राज्याचे हित नाही. मी म्हातारा झालो नाही. हे सरकार बदलल्याशिवाय शांत बसणार नाही. काही लोकांनी साथ सोडल्याचे सांगताना अनेकांसमोर तुरुंगांत जाण्याऐवजी मोदींसमोर जाऊन सलाम करणे हाच पर्याय होता, असा आरोप करत राज्यातील सत्तांतर व तोडाफोडीच्या राजकारणावर त्यांनी टीका केली. ‘‘केंद्रात संरक्षणमंत्री असताना सैन्यदलात महिलांना संधी दिली. लोकसभा निवडणुकीत महाराष्ट्रातील जनतेने महाविकास आघाडीला साथ दिली.
देशाची घटना राज्यातील मतदारांनी वाचविली. लोकसभा निवडणुकीत भाजपने ४०० पारची घोषणा केली, कारण त्यांना संविधान बदलायचे होते. मात्र, तुम्ही लोकांनी निर्णय हाती घेतला. तुम्ही-आम्ही एकत्र झालो आणि महाराष्ट्रातील ४८ खासदांरापैकी ३१ खासदार महायुतीचे निवडून दिले. या निकालामुळे घटना वाचवायचे काम तुम्ही केले आहे. लोकसभेप्रमाणेच विधानसभा तुमच्या विचाराच्या लोकांच्या हातात पाहिजे. सत्ता हातात आल्यावर लोकांचे प्रश्न सोडवता येतात’’, असे ते म्हणाले.
गंगापूर येथे…
‘भाजपच्या राजवटीत शेतकऱ्यांचे प्रश्न गंभीर झाले आहेत. शेतमालाला भाव नाही. कवडीमोल भावाने शेतमाल विकावा लागतो. त्यामुळे शेतकरी अडचणीत असून पाच महिन्यांत ९०० शेतकऱ्यांनी आत्महत्या केल्या. मात्र, सरकार त्याकडे लक्ष द्यायला तयार नाही, अशा भाजपच्या हातून सत्ता काढून घेतली पाहिजे,’’ असे शरद पवार म्हणाले. गंगापूर-खुलताबाद विधानसभा मतदारसंघातील राष्ट्रवादी काँग्रेस शरदचंद्र पवार पक्षाचे उमेदवार सतीश चव्हाण यांच्या प्रचारार्थ रविवारी गंगापूर येथे आयोजित सभेत ते बोलत होते. ‘शेतकरी आत्महत्या वाढल्या. आम्ही ७१ हजार कोटींची कर्जमाफी केली. ही संवेदनशीलता मोदी सरकारकडे नाही’, असा आरोपही त्यांनी केला.