महाराष्ट्र २४ – ऑनलाईन – विशेष प्रतिनिधी – पिंपरी चिंचवड – ता. ०५ ऑगस्ट – : अयोध्येत आज पंतप्रधान नरेंद्र मोदी यांच्या हस्ते राम मंदिर भूमिपूजनाचा सोहळा पार पडणार आहे. यासाठी अवघी अयोध्यानगरी सजली आहे. सध्याच्या करोनाच्या पार्श्वभूमीवर या ऐतिहासिक क्षणाचे साक्षीदार होण्यासाठी देशभरातील नागरिकांनी आहे तिथूनच हा सोहळा साजरा करण्याचे आवाहनही भाजपाकडून करण्यात आले आहे. यापार्श्वभूमीवर भोसरी विधानसभा मतदारसंघाचे भाजपाचे आमदार महेश लांडगे यांनी पिंपरी-चिंचवडमध्ये १० लाख लाडू वाटपाचा कार्यक्रम घोषित केला आहे. मात्र, पोलिसांनी यावर आक्षेप घेतला असून आमदार लांडगे यांना नोटीस पाठवली आहे.
पोलिसांनी आमदार लांडगे यांना मंगळवारी (४ ऑगस्ट) रोजी सीआरपीसी १४९ अंतर्गत ही नोटीस पाठवली असून यामध्ये म्हटले की, “राम मंदिर भूमिपूजनाच्या अनुषंगाने उद्या (५ ऑगस्ट) ठिकठिकाणी लाडू वाटून आनंद साजरा करणार असल्याची माहिती मिळाली आहे. सध्या करोनाचा वाढता प्रादुर्भाव लक्षात घेता लाडू वाटप करणे योग्य ठरणार नाही. त्यामुळे आपण हा लाडू वाटपाचा कार्यक्रम करु नये. यामुळे कायदा व सुव्यवस्थेचा प्रश्न निर्माण झाल्यास याची सर्वस्वी जबाबदारी आपल्यावर राहील.”
पिंपरी-चिंचवडमधील सुमारे ४० प्रमुख चौकात लाडू वाटप करण्यात येणार असल्याचे भाजपाच्यावतीने सांगण्यात आले होते. इंद्रायणीनगर येथील येथे मोठ्या हॉलमध्ये दोन दिवसांपासून लाडू तयार करण्याची लगबग सुरू आहे. त्यासाठी एका मोठ्या हॉलमध्ये व्यवस्था केली आहे. लाडू बनवण्यासाठी नेमण्यात आलेल्या कारागिरांची करोना चाचणी करण्यात आली आहे. फिजिकल डिस्टंन्सिगच्या नियमांचे पालन करूनच लाडू तयार करीत असल्याचं देखील त्यांनी सांगितलं आहे.