महाराष्ट्र २४ ।। विशेष प्रतिनिधी ।। दि. १९ नोव्हेंबर ।। शहरात विधानसभा निवडणूक प्रक्रिया शांततेत पार पाडण्यासह कायदा व सुव्यवस्था अबाधित राखण्यासाठी सुमारे दहा हजार पोलिसांचा बंदोबस्त तैनात करण्यात आला आहे. मतदान केंद्रांच्या परिसरात प्रतिबंधात्मक आदेश लागू राहतील. या आदेशाचे उल्लंघन केल्यास कारवाई करण्याचे आदेश पोलिस आयुक्त अमितेश कुमार यांनी दिले आहेत.
विधानसभा निवडणुकीसाठी बुधवारी (ता. २०) मतदान होत असून, शनिवारी (ता. २३) मतमोजणी होणार आहे. पुणे पोलिस आयुक्तालयाच्या कार्यक्षेत्रात वडगावशेरी, शिवाजीनगर, कोथरूड, खडकवासला, पर्वती, पुणे कॅन्टोन्मेंट, कसबा, हडपसर या विधानसभा मतदारसंघांचा समावेश होतो. याशिवाय, शिरूर, पुरंदर, भोर मतदारसंघातील काही भाग येतो. शहरात कायदा व सुव्यवस्था अबाधित राखण्यासाठी पोलिस आयुक्त अमितेश कुमार आणि पोलिस सह आयुक्त रंजनकुमार शर्मा यांच्या मार्गदर्शनाखाली पोलिस बंदोबस्त ठेवण्यात आला आहे.
बंदोबस्तात शहर पोलिस दलातील अधिकारी-कर्मचारी, केंद्रीय सशस्त्र पोलिस दल (सीएपीएफ), राज्य राखीव पोलिस दल (एसआरपीएफ), शीघ्र कृती दल (क्यूआरटी) आणि होमगार्ड यांचा समावेश आहे. याशिवाय आपत्कालीन बंदोबस्तासाठी स्वतंत्र पथके असतील. पोलिस नियंत्रण कक्ष आणि सीसीटीव्हीच्या माध्यमातून संशयितांवर नजर ठेवण्यात येत आहे. मतदान प्रक्रियेदरम्यान अनुचित प्रकार घडणार नाही, याबाबत खबरदारी घेण्याचे आदेश पोलिस आयुक्त अमितेश कुमार यांनी दिले आहेत.
* मतदान केंद्राच्या शंभर मीटर परिसरात मोबाईल बाळगण्यास मनाई.
* मतदान केंद्राच्या शंभर मीटर परिसरात छायाचित्रणास बंदी.
* ज्वलनशील वस्तू आणि शस्त्र बाळगण्यास मनाई.
विधानसभा निवडणूक पोलिस बंदोबस्त-
अतिरिक्त पोलिस आयुक्त ४
पोलिस उपायुक्त ११
सहाय्यक आयुक्त २२
पोलिस अधिकारी ६००
पोलिस अंमलदार ६८००
होमगार्ड १७५०
केंद्रीय सशस्त्र पोलिस दल कंपनी १५
राज्य राखीव पोलिस दल कंपनी २