महाराष्ट्र २४ ।। विशेष प्रतिनिधी ।। दि. २ डिसेंबर ।। राष्ट्रवादी काँग्रेस (शरदचंद्र पवार) पक्षाच्या मुख्य प्रतोदपदी सर्वांत तरुण आमदार आणि दिवंगत ज्येष्ठ नेते आर. आर. पाटील यांचे चिरंजीव रोहित पाटील यांची तर पक्षाच्या गटनेतेपदी आमदार जितेंद्र आव्हाड यांची निवड रविवारी करण्यात आली आहे. आमदार उत्तम जानकर यांच्यावर प्रतोदपदाची जबाबदारी देण्यात आली आहे. मात्र विधिमंडळ पक्षाच्या नेत्यांबाबत कोणताही निर्णय झालेला नाही.
पक्षाच्या नवनिर्वाचित आमदारांच्या मुंबईत झालेल्या बैठकीत या नावांची घोषणा करण्यात आली. पक्षाचे प्रदेशाध्यक्ष जयंत पाटील यांनी पत्रकार परिषदेत याबाबत माहिती दिली. त्यानुसार, कळवा-मुंब्रा विधानसभेतून आमदार बनलेले राष्ट्रवादीचे वरिष्ठ नेते जितेंद्र आव्हाड हे राष्ट्रवादीचे गटनेते बनले आहेत. तर, मुख्य प्रतोदपदी दिवंगत नेते आर.आर. पाटील यांचे चिरंजीव आमदार रोहित पाटील यांना संधी ली आहे. तसेच, माळशिरसचे आमदार उत्तम जानकर यांना प्रतोदपदी नियुक्ती केली आहे.
बैठकीला बीडचे आमदार संदीप क्षीरसागर वगळता अन्य नऊ सदस्य उपस्थित होते. राज्यातील विधानसभा निवडणुकांच्या निकालात महाविकास आघाडीला अपेक्षित यश मिळालेले नाही. केवळ ४९ जागांवर त्यांना समाधान मानावे लागले. त्यात २० जागांवर विजय मिळवून शिवसेना (ठाकरे गट) हा सर्वांत मोठा पक्ष ठरला आहे.
काँग्रेसने १७ आणि राष्ट्रवादी काँग्रेस (शरदचंद्र पवार) पक्षाला दहा जागांवर यश मिळाले आहे.कमी संख्याबळाअभावी महायुतीमधील एकाही पक्षाकडे विरोधी पक्षनेतेपद मिळणार नाही. त्यामुळे महाविकास आघाडीमधील पक्षांकडून विधिमंडळ गटनेते आणि प्रतोदपदी पक्षातील नवनिर्वाचित आमदारांची नियुक्ती केली जात आहे.
काही दिवसांपूर्वी शिवसेनेने (उद्धव बाळासाहेब ठाकरे) मुंबईत बैठक घेऊन गटनेता व प्रतोद यांची निवड केली होती. आता शरद पवार यांच्या राष्ट्रवादीनेही गटनेता, मुख्य प्रतोद आणि प्रतोद यांची नियुक्ती केली आहे.