महाराष्ट्र २४ ।। विशेष प्रतिनिधी ।। दि. १४ डिसेंबर ।। Gold Prices Outlook In 2025: सोन्यात गुंतवणूक करणाऱ्या गुंतवणूकदारांसाठी 2024 हे वर्ष उत्तम ठरले आहे. चालू वर्षात सोन्याच्या किमतीत 30 टक्क्यांहून अधिक वाढ झाली असून सोन्याच्या किमतींनी आतापर्यंतचा उच्चांक गाठला आहे.
गेल्या 10 वर्षांच्या ट्रॅक रेकॉर्डवर नजर टाकली तर सोन्याने यावर्षी चांगला रिटर्न दिला आहे. पण 2025मध्ये सोन्याची कामगिरी कशी असेल, असा प्रश्न उपस्थित होत आहे. वर्ल्ड गोल्ड कौन्सिलने याबाबतचा अहवाल प्रसिद्ध केला आहे.
जागतिक सुवर्ण परिषदेच्या अहवालानुसार, आर्थिक आणि भू-राजकीय संकटामुळे सोन्याच्या भावातील वाढ 2024 सारखी राहणार नाही. अहवालानुसार, 2025 मध्ये सोन्याचे भाव अमेरिकेत घडणाऱ्या घटनांवर अवलंबून असतील.
विशेषत: 20 जानेवारी 2025 रोजी दुसऱ्यांदा अमेरिकेच्या अध्यक्षपदाची शपथ घेणारे डोनाल्ड ट्रम्प यांच्या दुसऱ्या टर्मवर बाजाराची नजर असेल. ट्रम्प यांच्या दुसऱ्या कार्यकाळात स्थानिक अर्थव्यवस्थेला बूस्टर डोस मिळेल. मात्र त्याचवेळी जगभरातील गुंतवणूकदारांमध्ये भीतीचे वातावरण निर्माण होणार आहे.
अहवालानुसार, 2025 मध्ये फेडरल रिझर्व्ह अमेरिकेची मध्यवर्ती बँक ही वर्षाच्या अखेरीस 100 आधार अंकांनी व्याजदरात कपात करू शकते यावर एकमत आहे. युरोपियन सेंट्रल बँक देखील व्याजदर कमी करू शकते. यूएस डॉलर फ्लॅट राहू शकतो किंवा थोडा कमजोर होऊ शकतो. फेडरल रिझर्व्हचे निर्णय अमेरिकन डॉलरची हालचाल तसेच सोन्याच्या किमतीची दिशा ठरवेल
अहवालानुसार भारत आणि चीन ही सोन्याची सर्वात मोठी बाजारपेठ आहे. सोन्याच्या एकूण मागणीपैकी 60 टक्के मागणी आशिया खंडातून येते. यामध्ये मध्यवर्ती बँकांद्वारे केलेल्या खरेदीचा समावेश नाही. चीनच्या अर्थव्यवस्थेच्या कामगिरीवर तेथील सोन्याची मागणी अवलंबून असेल. मात्र, भारतात परिस्थिती खूपच चांगली आहे. भारतात सोन्याची ग्राहकांची मागणी चांगली राहील.
वर्ल्ड गोल्ड कौन्सिलच्या मते, 2024 मध्ये सेंट्रल बँकेने केलेली खरेदी आणि गुंतवणूकदारांनी केलेली गुंतवणूक वाढल्यामुळे सोन्याच्या किमतीत वाढ झाली. ग्राहकांच्या मागणीत घट होऊनही सोन्याच्या भावात वाढ दिसून आली आहे.
2024 च्या तिसऱ्या तिमाहीपर्यंत जगभरातील केंद्रीय बँकांकडून 694 टन सोने खरेदी करण्यात आले आहे. RBI ने ऑक्टोबरमध्ये 27 टन सोन्याची खरेदी केली आहे आणि 2024 मध्ये एकूण खरेदी 77 टन झाली आहे. ही खरेदी गेल्या वर्षीच्या तुलनेत 5 पट जास्त आहे.