महाराष्ट्र २४ ।। विशेष प्रतिनिधी ।। दि.२३ जानेवारी ।। बाबासाहेब पाटील यांना पवार साहेबांशी काही बोलायचे होते, त्यामुळे ते साहेबांजवळ जाऊन बसले. माझा आवाज मोठा आहे. त्यामुळे मी कोठूनही बोललो, तरी आवाज साहेबांपर्यंत जातो, असा खुलासा उपमुख्यमंत्री तथा अर्थमंत्री अजित पवार यांनी आज (दि.२३) केला.
पुण्यातील वसंतदादा शुगर इन्स्टिट्यूटच्या वार्षिक सर्वसाधारण सभेत गुरुवारी उपमुख्यमंत्री अजित पवार आणि राष्ट्रवादी शरदचंद्र पवार पक्षाचे प्रमुख शरद पवार एकाच व्यासपीठावर आले. यावेळी अजित पवार आणि शरद पवार यांच्या खुर्चीची व्यवस्था बदलण्यात आली होती. यावर पवार यांनी खुलासा केला. याच कार्यक्रमात शरदचंद्र पवार पक्षाचे प्रदेशाध्यक्ष जयंत पाटील अजित पवार यांच्यासोबत बसले होते. यावेळी दोघांमध्ये दिलखुलास गप्पा सुरू होत्या. याची चर्चा कार्यक्रमस्थळी सुरू होती.
ते पुढे म्हणाले की, शरद पवारांशी साखर व्यवसायाबाबत चर्चा केली. येत्या काळात जगभर साखरेची मागणी वाढेल, असे जाणकारांचे मत आहे. एप्रिल, मे, जून महिन्यात साखरेला दर चांगले मिळतील. त्यामुळे साखर विक्रीची घाई कुणी करू नये, असे स्पष्ट करत साखरेची एफआरपी वाढत गेली आहे. परंतु त्या प्रमाणात एमएसपी जशी आहे तशीच आहे. साखरेचे दर आणखी वाढतील, असे पवार म्हणाले.
काका- पुतण्यामध्ये बंद दाराआड चर्चा
याआधी बारामती येथील कृषी प्रदर्शनादरम्यान काका आणि पुतणे एकत्र दिसले होते. त्यावेळी अजित पवार आणि शरद पवार एकत्र येतील, अशी अटकळ बांधण्यात आली होती. आता पुन्हा एकदा दोन्ही नेते एकत्र आले आहेत. वसंतदादा शुगर इन्स्टिट्यूटच्या वार्षिक सर्वसाधारण सभेच्या आधी दोन्ही नेते एकमेकांना भेटले. आज अजित पवार प्रेसिडेंट लिहिलेल्या केबिनमध्ये जातानाचा व्हिडिओ समोर आला आहे. यावेळी काका- पुतण्यामध्ये बंद दाराआड चर्चा झाली. पण दोघांत नेमकी काय चर्चा झाली? याची माहिती अद्याप समोर आलेली नाही.