महाराष्ट्र २४ ।। विशेष प्रतिनिधी ।। दि. १४ एप्रिल ।। बहुप्रतीक्षित कात्रज स्वारगेट- भूमिगत मेट्रो मार्गाच्या प्रत्यक्ष कामाला चार महिन्यांनंतर सुरुवात होणार आहे. यासंदर्भातील निविदा प्रक्रिया सुरू असून, ऑगस्ट महिन्यामध्ये प्रत्यक्ष कामाला सुरुवात होण्याची शक्यता आहे.
पंतप्रधान नरेंद्र मोदी यांच्या हस्ते मागील काही महिन्यांपूर्वी स्वारगेट- सिव्हिल कोर्ट भूमिगत मार्गाचे उद्घाटन आणि त्याचवेळी स्वारगेट- कात्रज भूमिगत मार्गाचे भूमिपूजन करण्यात आले. यामुळे पुणेकरांची वाहतूक कोंडीपासून सुटका होणार आहे.
भूमिपूजन कार्यक्रमानंतर या मार्गाचे प्रत्यक्ष काम सुरू करण्यासाठी मेट्रोकडून युद्धपातळीवर तयारी केली जात आहे. स्वारगेट- कात्रज भूमिगत मेट्रो मार्गासाठी 100 मीटरपेक्षा अधिक जमिनीखालून खोदकाम करावे लागणार आहे.
त्याकरिता आवश्यक असलेल्या जिऑलॉजिकल सर्व्हे मेट्रोकडून करण्यात आला आहे. आता निविदा प्रक्रिया सुरू करण्यात आली आहे. ही पूर्ण झाल्यावर अवघ्या चार महिन्यांनंतर म्हणजेच ऑगस्ट 2025 पासून किंवा त्यानंतरच्या महिन्यापासून या कामाला प्रत्यक्ष सुरुवात होण्याची शक्यता आहे, अशी माहिती मेट्रो अधिकार्‍यांनी दिली.
असा असेल स्वारगेट- कात्रज मेट्रोमार्ग
स्वारगेट- कात्रज हा मेट्रो मार्ग पूर्णत: भूमिगत असणार आहे.
पर्पल मार्गिकेतील 5.46 कि.मी.ची विस्तारित मार्गिका आहे.
तीन भूमिगत स्थानकांचा समावेश असणार
स्थानके मार्केट यार्ड, बिबवेवाडी, बालाजीनगर आणि कात्रज उपनगरे यांसारख्या प्रमुख क्षेत्रांना जोडतील
2954.53 कोटीपर्यंत खर्च येणार
फेब्रुवारी 2029 पर्यंत कामे पूर्ण करण्याचे ध्येय
आगामी काळात मेट्रोने थेट कात्रज ते निगडीपर्यंत प्रवास शक्य
स्वारगेट- कात्रज भूमिगत मेट्रो मार्गाच्या प्रत्यक्ष कामाला आगामी चार महिन्यांनंतर सुरुवात होणार आहे. यासंदर्भातील निविदा प्रक्रिया काम सुरू असून, तिचे काम पूर्ण झाल्यावर प्रत्यक्ष कामाला सुरुवात होईल. दरम्यान, याकरिता या मार्गावर जिऑलॉजिकल सर्व्हे करणे आवश्यक आहे. त्यानुसार आम्ही हा सर्व्हे पूर्ण केला आहे.
– हेमंत सोनावणे, कार्यकारी संचालक, महाव्यवस्थापक, महामेट्रो
