महाराष्ट्र २४ ।। विशेष प्रतिनिधी ।। दि. २५ मे ।। संपूर्ण प्लास्टिक बंदी होणे काळाची गरज आहे. याबाबत मुख्यमंत्री देवेंद्र फडणवीस यांच्याशी आजच बोलणार आहे. त्यानुसार लवकरच राज्यात संपूर्ण प्लास्टिक बंदीबाबतचा निर्णय घेऊ, अशी ग्वाही राज्याचे उपमुख्यमंत्री अजित पवार यांनी शनिवारी दिली.
पशुवैद्यकीय जैव पदार्थ निर्मिती प्रयोगशाळेत देवी लसीचे उत्पादन सुरू करणे, राष्ट्रीय संदर्भ लस चाचणी प्रयोगशाळा, जैवसुरक्षा पातळी (बायो सिक्युरिटी लेव्हल) दोन आणि तीन प्रयोगशाळा, सुपर स्पेशालिटी पशुवैद्यकीय रुग्णालय यांच्या उद्घाटन कार्यक्रमात उपमुख्यमंत्री पवार बोलत होते.
प्लास्टिकबंदीसाठी आग्रही, ही काळाची गरज –
उपमुख्यमंत्री पवार म्हणाले, ‘पावसाळ्यात कुठेही काहीही तुंबले, की त्याला प्लास्टिक कारणीभूत ठरते. त्यामुळे प्लास्टिकबंदी ही काळाची गरज आहे. मी स्वत: प्लास्टिकबंदीसाठी आग्रही आहे. आज पुण्याहून विमानातून मुंबईला जातानाच मुख्यमंत्री फडणवीस यांच्याशी याबाबत बोलणार असून, लवकरच राज्यात संपूर्ण प्लास्टिक बंदीसाठीचा निर्णय घेऊ.’
अनेक गायींच्या पोटात प्लास्टिक सापडत असल्याने त्यांच्या दुधापासून बाळांना आजार होत आहेत. याबाबत जनजागृती होण्यासाठी जागतिक पर्यावरण दिनापासून (६ जून) पशुसंवर्धन खात्यात ‘नो से नो प्लास्टिक’ ही मोहीम राबविण्यात येणार आहे, अशी माहिती पशुसंवर्धन मंत्री पंकजा मुंडे यांनी पशुवैद्यकीय रुग्णालय यांच्या उद्घाटन कार्यक्रमानंतर पत्रकारांशी बोलताना ही माहिती दिली.
‘पशुसंवर्धन व्यवसायाला कृषीचा समकक्ष दर्जा देण्यासाठीची फाइल वित्त व नियोजन विभागाकडे प्रलंबित आहे. मंगळवारी (२७ मे) होणाऱ्या मंत्रिमंडळ बैठकीत याबाबतची शिफारस केली जाईल,’ अशी ग्वाही पवारांनी दिली.
परदेशात ‘चक्की पिसिंग…’
‘सरकारी कार्यालयांच्या उद्घाटनाच्या कार्यक्रमाला जाताना मी नेहमी बांधकाम कसे केले आहे, याची पाहणी करत असतो. आजही पाहणी करत असताना कचरा दिसला. इतके चांगले काम केले आणि थोडा कचरा काढण्याचे राहून गेले. परदेशात गेल्यानंतर आपण सार्वजनिक ठिकाणी कचरा केल्यास थेट ‘चक्की पिसिंग’ला पाठविले जाते. त्यामुळे सार्वजनिक ठिकाणी कचरा न टाकण्याची सुरूवात स्वत:पासून केली पाहिजे,’ असे आवाहन पवार यांनी केले.