महाराष्ट्र २४ ।। विशेष प्रतिनिधी ।। दि. १६ जून ।। गेल्या तीन दिवसांपासून पुणे शहरात पावसाच्या हलक्या सरी कोसळत आहेत. मात्र पुढील चार ते पाच दिवस उकाड्यात वाढ होणार असल्याची शक्यता भारतीय हवामानशास्त्र विभागाने वर्तवली आहे.
कमाल तापमान चार अंश सेल्सिअसपर्यंत नोंदविण्यात येणार असून, हलका ते मध्यम स्वरूपाचा पाऊस पडण्याची शक्यता आहे. त्यामुळे उकाड्यात भर पडण्याची चिन्हे आहेत.शहरात गेल्या तीन दिवसांपासून दररोज सायंकाळी पावसाच्या हलक्या सरी कोसळत आहेत.
शहराच्या मध्यवर्ती भागात विजांचा कडकडाट, वादळी वारे आणि मेघगर्जनेसह पावसाच्या सरी पडत असल्या, तरी दुपारच्या वेळी पडणारे कडक ऊन आणि ढगाळ वातावरण, यामुळे उकाड्याचा अनुभव येत आहे.
रविवारी (ता. १५) कमाल तापमान ३० अंश सेल्सिअस आणि किमान तापमान २२.४ अंश सेल्सिअस इतके नोंदविण्यात आले. मात्र येत्या चार दिवसांत कमाल तापमानात वाढ होऊन ३४ अंश सेल्सिअसपर्यंत पोहोचणार आहे. आकाश अंशतः ढगाळ राहणार असून, हलका ते मध्यम स्वरूपाच्या पावसाची शक्यता आहे.
पुणे आणि परिसरात सोमवारी (ता. १४) कमाल आणि किमान तापमानात दोन अंश सेल्सिअसने वाढ होणार असून, कमाल तापमान ३२ अंश सेल्सिअस तर किमान तापमान २४ अंश सेल्सिअस राहण्याची शक्यता आहे. आकाश अंशतः ढगाळ राहणार असून, हलका ते मध्यम स्वरूपाचा पाऊस पडण्याची शक्यता आहे. शहरात रविवारीही पावसाने हजेरी लावली. दिवसभर ढगाळ वातावरण होते. सायंकाळच्या सुमारास शहराच्या मध्यवर्ती भागासह उपनगरांत हलक्या सरी कोसळल्या.