महाराष्ट्र २४ ।। विशेष प्रतिनिधी ।। दि. २५ जून ।। राज्य परिवहन विभागाच्या वतीने सर्व वाहनांवर उच्च सुरक्षा नोंदणी क्रमांक प्लेट (एचएसआरपी) बसविण्याची मोहीम शासनाने हाती घेतली. मात्र अनेक नागरिक बोगस संकेतस्थळाच्या जाळ्यात अडकत असल्याचे धक्कादायक वास्तव पुढे आले. पैसेही गेले आणि नंबर प्लेटही आली नाही, अशी व्यथा या नागरिकांनी मांडली.
1 एप्रिल 2019 पूर्वीच्या सर्व जुन्या वाहनांना ‘एचएसआरपी’ लावणे बंधनकारक करण्यात आले आहे. 1 जानेवारी 2025 पासून ही नवी नंबर प्लेट लावण्याची मोहीम हाती घेण्यात आली. सुरुवातीला 31 मार्च आणि नंतर 30 जूनपर्यंत अशी दोनदा मुदतवाढ देण्यात आली; परंतु सहा महिन्यांचा कालावधी होऊनही फारसा प्रतिसाद मिळत नसल्याचे चित्र आहे.
शनीच्या कृपेने या राशीचा गोल्डन टाईम होणार सुरु…!
आता पुन्हा ही मुदत वाढविण्यात आली आहे. आता 15 ऑगस्ट 2025 शेवटची तारीख आहे. मात्र नंबरप्लेट बसविण्यासाठीच्या अनेक तांत्रिक अडचणी येत असल्याने नंबर प्लेट बसवून घेणाऱ्यांची संख्या तुलनेने खूपच कमी आहे. नागपूर जिल्ह्यातील तीन आरटीओ कार्यालयांतर्गत 22 लाख 34 हजार वाहनांना ‘एचएसआरपी’ बसविण्याची गरज आहे. मात्र आतापर्यंत केवळ 5 ते 6 टक्केच नंबर प्लेट बसवून झाल्या आहेत.
थोडक्यात बचावले
नवीन नंबर प्लेटसाठी गुगलवर एचएसआरपी टाइप केल्यानंतर hsrpservice.online, hsrp-India.org, hsrponline.org.in, hsrpbookingindia.org अशा संकेतस्थळांची यादी दिसली. या साइटवर गेल्यानंतर राज्य निवडले. शहर असा पर्याय येण्यापूर्वीच पैसे भरण्याची लिंक आली. काही गडबड आहे, असा संशय आल्याने मी पैसे भरले नाही, असा अनुभव विभा बोरकर यांनी सांगितला.
पैसे घेऊन साध्या नंबर प्लेट दिल्या
अधिकृत संकेतस्थळावर न जाता अनेक जण बोगस संकेतस्थळावर जात आहेत. दुचाकीसाठी काहींनी 531 ऐवजी 900 रुपये भरले. कारसाठी काहींनी तर बाराशे रुपयांपेक्षा अधिक रुपये भरले. आमच्याकडे तोंडी तक्रारी प्राप्त होत आहेत. मात्र मोठी फसवणूक नसल्याने लेखी तक्रार करायला कोणी पुढे येत नाही. नागरिकांनी सतर्क राहून अधिकृत संकेतस्थळावरच नोंदणी करावी, असे आवाहन प्रादेशिक परिवहन अधिकारी (ग्रामीण) विजय चव्हाण यांनी केले.
अधिकृत प्रक्रिया अशी
https://transport.maharashtra.gov.in या संकेतस्थळावर गेल्यानंतर अप्लाय एचएसआरपी वर क्लिक करा. झोनची निवड करून ऑर्डर एचएस आरपी वर क्लिक केल्यानंतर वाहनाची माहिती टाका. त्यानंतर शुल्क भरून जवळचे केंद्र निवडा, असे प्रशासनाकडून सांगण्यात आले.
असे आकारले जातात शुल्क
वाहन : जीएसटी सह शुल्क
दुचाकी : 531
कार : 879
ऑटोरिक्षा : 590