महाराष्ट्र २४ ।। विशेष प्रतिनिधी ।। दि. १० जुलै ।। बुधवारी आंतरराष्ट्रीय बाजारात सोन्याच्या किंमतीत मोठी घसरण पाहायला मिळाली. गेल्या आठवड्यात सोन्याचे भाव कमी झाले होते. अमेरिकन डॉलरच्या तेजीमुळे आणि ट्रेझरी यील्ड वाढल्यामुळे ही घसरण झाली आहे. त्यातच अमेरिकेचे राष्ट्राध्यक्ष डोनाल्ड ट्रंप यांनी पुन्हा टॅरिफचा रेटा सुरू केल्याने जागतिक बाजारात अस्थिरता निर्माण झाली आहे. भारतात रुपया मजबूत झाल्यामुळेही सोने स्वस्त झालं आहे.
सोन्याचे भाव का घसरले?
सकाळी 6:24 वाजता, आंतरराष्ट्रीय बाजारात स्पॉट गोल्ड 0.4 टक्क्यांनी घसरून 3,286 डॉलर प्रति औंसवर होते. अमेरिकन फ्युचर्समध्येही 0.7 टक्क्यांची घसरण झाली. भारतात MCX वर ऑगस्ट डिलिव्हरीचा सोने करार 0.30 टक्क्यांनी घसरून 96,178 रुपये प्रति 10 ग्रॅम झाला.
या घसरणीचं मुख्य कारण म्हणजे डॉलरच्या तुलनेत इतर चलनांमध्ये झालेली घसरण. त्यात ट्रंप यांनी टॅरिफबाबत दिलेल्या धमक्यांमुळे गुंतवणूकदारांमध्ये भीती पसरली आहे. त्यांनी कॉपरवर 50% टॅरिफ लावण्याचं, फार्मा व सेमीकंडक्टर क्षेत्रांवरही टॅरिफ लावण्याची घोषणा केली आहे.
भारतामध्ये रुपया 0.23 टक्क्यांनी मजबूत झाल्यामुळे सोने आणखी स्वस्त झालं. LKP सिक्युरिटीजचे रिसर्च अॅनालिस्ट जतिन त्रिवेदी यांच्या मते, आंतरराष्ट्रीय बाजारात सोन्याला 3,290 डॉलरवर सपोर्ट आणि 3,330 डॉलरवर रेसिस्टन्स आहे. भारतात 95,500 रुपयांवर सपोर्ट तर 97,500 रुपयांवर रेसिस्टन्स आहे. ते पुढे म्हणाले की, अमेरिकेच्या रोजगाराच्या आकड्यांनंतर सोने कोणत्या दिशेने जाईल याचा अंदाज येईल. हे आकडे फेडरल रिझर्व्हच्या धोरणांवर प्रभाव टाकतील.
PL कॅपिटलचे सीईओ संदीप रायचुरा यांच्या मते, मध्यम आणि दीर्घकालीन दृष्टीने सोने अजूनही मजबूत आहे. प्रत्येक वर्षी जगभरातील सेंट्रल बँका 1,000 टनांपेक्षा जास्त सोने खरेदी करत आहेत. अमेरिकेत महागाई अजूनही नियंत्रणाबाहेर आहे, त्यामुळे सोन्याच्या भावात वाढ होऊ शकते.
गुंतवणूकदारांसाठी सुवर्णसंधी?
तज्ज्ञांच्या मते, सध्याची घसरण म्हणजे दीर्घकालीन गुंतवणुकीची एक चांगली संधी असू शकते. डॉलर, महागाई, ट्रंप यांच्या धोरणांमुळे बाजारात अस्थिरता आहे. मात्र गुंतवणूकदारांनी अमेरिकेतील आर्थिक आकडे आणि जागतिक व्यापारातील घडामोडींवर सतत नजर ठेवायला हवी.
नोंद – सोनं, चांदी, क्रिप्टो मार्केट, शेअर मार्केट किंवा म्युच्युअल फंडातील गुंतवणुकीत जोखीम असते. यामध्ये फायद्याप्रमाणे नुकसान होण्याचीही शक्यता असते. त्यामुळे क्रिप्टो, शेअर बाजार किंवा म्युच्युअल फंडातील कोणतीही गुंतवणूक करण्याआधी आपल्या वित्तीय सल्लागारासोबत चर्चा करूनच गुंतवणूक करा. किंवा म्युच्युअल फंडातील कोणतीही गुंतवणूक करण्याआधी आपल्या वित्तीय सल्लागारासोबत चर्चा करूनच गुंतवणूक करा.