महाराष्ट्र २४ ।। विशेष प्रतिनिधी ।। दि. १७ जुलै ।। अधिकाऱ्यांची चौकशी होऊन आरोप निश्चित झाले तरी ते त्याच जागी कायम राहतात. एसटी महामंडळात गेल्या काही वर्षांपासून काय चालले आहे, हे मलाही कळत नाही,’ असे उद्विग्न उद्गार काढले आहेत दस्तुरखुद्द परिवहन मंत्री प्रताप सरनाईक यांनी.
आमदार अनिल परब यांनी पुण्यातील दापोडी आणि छत्रपती संभाजीनगरमधील चिकलठाणा मध्यवर्ती भांडार खरेदीत झालेल्या अनियमिततेची चौकशी करण्यासंदर्भात विधान परिषदेत प्रश्न उपस्थित केला. अधिकाऱ्यांविरोधात तक्रारींबाबत लाचलुचपत प्रतिबंधक विभागाने चौकशी सुरू केली आहे का, असे आमदार परब यांनी विचारले. त्यावर उत्तर देताना परिवहन मंत्री सरनाईक यांनी परब यांना उद्देशून , ‘तुम्हीही या खात्याचे मंत्री होतात, तुम्हालाही पटेल की या एसटी महामंडळात नेमके काय सुरू आहे तेच कळत नाही .
अधिकाऱ्यांची चौकशी होऊन आरोप निश्चित झाले तरीही ते त्याच जागी कायम राहतात,’ असे सांगून सरनाईक यांनी एका अधिकाऱ्यावर नोंदविण्यात आलेल्या आक्षेपांची जंत्रीच वाचून दाखवली. यावर सभापती राम शिंदे यांनी, कारवाई काय करणार हे सांगा, अशी सूचना केली. आमदारांनीही कारवाईची मागणी केली.
मुख्यमंत्र्यांचा हस्तक्षेप
गंभीर गैरव्यवहारांप्रकरणी संबंधित अधिकाऱ्यांवर अनेक आरोप असल्याने त्यांना बडतर्फ करण्यात येईल, अशी घोषणा परिवहनमंत्र्यांनी केली. तथापि मुख्यमंत्री देवेंद्र फडणवीस यांनी हस्तक्षेप करून, संबंधित अधिकाऱ्यांना केवळ निलंबित करून भागणार नाही, तर स्पष्ट कायदेशीर नोटीस देऊन, त्यांचे म्हणणे ऐकून घेऊन नंतर ‘स्पीकिंग ऑर्डर’ देऊन बडतर्फ केले जावे. त्यावर परिवहन मंत्री यांनी ‘स्पीकिंग ऑर्डर’ देऊन अधिकाऱ्याला बडतर्फ केले जाईल, असे सांगितले.