✍️ महाराष्ट्र २४ | विशेष प्रतिनिधी | दिनांक ३ डिसेंबर २०२५ | रूपया ९० पार; आंतरराष्ट्रीय दबावात भारताची आर्थिक फजीती उघडी! जागतिक बाजारपेठेत अस्थिरतेचे ढग दाटले… आणि भारतीय रूपया थेट इतिहासातील सर्वात खालच्या पातळीवर घसरला! आंतरराष्ट्रीय दबाव, क्रिप्टो बाजारातील भूचाल आणि डॉलरच्या वाढत्या मागणीच्या संयुक्त फटक्याने रूपयाने आज ९०.१५ या विक्रमी नीचांकी आकड्याला स्पर्श केला. कालच ८९.९६ वर बंद झालेला रूपया आज ६ पैशांनी घसरत नव्या लाजिरवाण्या पातळीवर स्थिरावला. जगभरात सुरू असलेल्या आर्थिक चिंतेने रूपया डगमगत असल्याचे स्पष्ट दिसत आहे.
आंतरबँक चलनबाजारात आज रूपया ८९.९६ वर उघडला, थेट ९०.१५ पर्यंत कोसळला आणि शेवटी ९०.०२ वर कसाबसा आधार मिळवला. डॉलरसमोर सतत चाललेल्या ‘सेल-ऑफ’मुळे रूपयाचे मूल्य ढासळतच राहिले. आयातदारांकडून वाढलेल्या डॉलरखरेदीमुळे परिस्थिती आणखी बिकट बनली. सट्टेबाजांकडून होणाऱ्या शॉर्ट-कव्हरिंगनेही बाजारातील अस्थिरता वाढवण्याचंच काम केलं.
या घसरणीमागे भारत-अमेरिका व्यापार करारावरील अनिश्चितता मोठा घटक ठरल्याचे तज्ज्ञांचे म्हणणे आहे. एलकेपी सिक्युरिटीजचे जतीन त्रिवेदी सांगतात, “करारात सतत होणारा विलंब, जागतिक बाजारातील दबाव, आयात वाढ, सोने–धातूच्या किमतीतील इंधनासारखी वाढ — या सगळ्यामुळे रूपयाची धाव खालीच आहे. आरबीआयने मूक हस्तक्षेप केल्याने बाजारातील घसरण आणखी वेगात झाली.” त्यात अमेरिकेच्या शुल्कवाढीमुळे भारताच्या निर्यात क्षेत्रावर ताण निर्माण झाला असून गुंतवणूकदारांचा आत्मविश्वास ढासळला आहे.
तज्ज्ञांच्या मते, रूपया तांत्रिकदृष्ट्या ‘ओव्हरसोल्ड’ स्थितीत असून कोणत्याही अर्थपूर्ण उसळी साठी त्याने पुन्हा ८९.८० च्या वर जाणे आवश्यक आहे. बाजाराची नजर आता आरबीआयच्या शुक्रवारी येणाऱ्या धोरणावर खिळली आहे—मध्यवर्ती बँक रूपयाला हात देईल का, की बाजारास स्वतःच सावरू देईल? तोपर्यंत मात्र, भारतीय चलनाचे अवमूल्यन देशाच्या आर्थिक नर्व्हज प्रणालीलाच हादरे देत आहे.