✍️ महाराष्ट्र २४ | विशेष प्रतिनिधी | दिनांक १७ डिसेंबर २०२५ | पुणे ते जळगाव हा प्रवास आजवर ‘निघालो सकाळी, पोहोचलो संध्याकाळी’ अशा श्रेणीत मोडणारा. पण आता चित्र बदलणार आहे. केंद्र सरकारने पुणे ते छत्रपती संभाजीनगर या मार्गावर आत्याधुनिक एक्सप्रेस वे उभारण्याची घोषणा केली असून, पुढे हा मार्ग जळगावपर्यंत जोडला जाणार आहे. केंद्रीय मंत्री नितीन गडकरी यांनी दिलेल्या माहितीनुसार हा महामार्ग पूर्ण झाल्यानंतर पुणे ते संभाजीनगर फक्त दोन तासांत आणि जळगाव ते पुणे अवघ्या तीन तासांत गाठता येणार आहे. अत्रे असते तर म्हणाले असते—वेळ वाचली की माणूसच नाही, राज्यही पुढे धावू लागतं!
सध्या पुण्याहून छत्रपती संभाजीनगरला जाण्यासाठी सहा ते साडेसहा तासांचा वेळ लागतो. घाट, वाहतूक कोंडी आणि मधल्या शहरांमुळे प्रवास दमवणारा ठरतो. नव्या एक्सप्रेस वेमुळे हा वेळ थेट दोन तासांवर येईल, असा दावा आहे. हा महामार्ग पूर्णतः आत्याधुनिक असेल—रुंद लेन, सुरक्षितता यंत्रणा, वेगवान वाहतुकीसाठी आधुनिक तंत्रज्ञान यांचा समावेश असणार आहे. त्यामुळे हा केवळ रस्ता न राहता, पुणे आणि मराठवाड्याला जोडणारी विकासाची द्रुतगती वाहिनी ठरणार आहे.
या प्रकल्पासोबतच सरकारने आणखी एक महत्त्वाचा निर्णय घेतला आहे. मुंबई–नागपूर समृद्धी महामार्गाला जळगाव जोडण्याचा निर्णय झाला असून, त्यासाठी जळगाव ते छत्रपती संभाजीनगर स्वतंत्र एक्सप्रेस हायवे उभारण्यात येणार आहे. सध्या जळगावहून संभाजीनगरला अजिंठा–सिल्लोड मार्गे अडीच तास लागतात. नवीन एक्सप्रेस वेमुळे हा प्रवास फक्त एका तासात होईल. पुढे संभाजीनगर ते पुणे दोन तास—म्हणजे जळगाव ते पुणे थेट तीन तास! इतक्या कमी वेळात अंतर संपतं, तेव्हा भौगोलिक नकाशेही बुचकळ्यात पडतात, असं म्हटलं तरी वावगं ठरणार नाही.
या पुणे–छत्रपती संभाजीनगर महामार्गासाठी सुमारे १६,३१८ कोटी रुपयांचा खर्च अपेक्षित आहे. हा प्रकल्प केवळ प्रवासाचा वेळ कमी करणारा नाही, तर महाराष्ट्राच्या औद्योगिक, व्यापारी आणि सामाजिक विकासाला चालना देणारा ठरणार आहे. उद्योगांना वेग, शेतमालाला बाजारपेठ आणि नागरिकांना सुलभ प्रवास—असा हा एक्सप्रेस वे म्हणजे विकासाचा थेट ‘फास्ट ट्रॅक’. शेवटी एवढंच—रस्ता जेव्हा सरळ होतो, तेव्हा भविष्यही वळणं सोडतं!