💉 “रक्त नाल्यात नव्हे, नाड्यांत वाहिले पाहिजे!” — चाकणमध्ये मानवतेचा लाल उत्सव 💉

“रक्त नाल्यांमध्ये नाही, तर नाड्यांमध्ये वाहिले पाहिजे” हा संदेश देणारे बाबा हरदेव सिंहजी महाराज यांच्या विचारांचा प्रत्यय या उपक्रमातून पुन्हा एकदा आला. सद्गुरू माता सुदीक्षा जी महाराज यांच्या मार्गदर्शनाखाली हा मानवतेचा संदेश आजही अखंडपणे पुढे नेला जात आहे. रक्तदानासारख्या महत्त्वाच्या कार्यातून समाजात परस्पर प्रेम, सहकार्य आणि सौहार्दाची नवी उर्जा निर्माण होत असल्याचे या शिबिरातून स्पष्ट झाले.

चाकण परिसरात मिशनकडून नियमितपणे स्वच्छता अभियान, वृक्षारोपण आणि विविध समाजोपयोगी उपक्रम राबवले जातात. या कार्याची दखल घेत केंद्र व राज्य सरकारांनीही वेळोवेळी मिशनचा गौरव केला आहे. या रक्तदान शिबिराच्या यशस्वीतेसाठी संत निरंकारी सेवादल आणि स्वयंसेवकांनी मोलाची भूमिका बजावली. विशेष म्हणजे, रक्तदानाबाबत जनजागृती करण्यासाठी स्वयंसेवकांनी घराघरात जाऊन लोकांना प्रेरित केले. शिबिराचे उद्घाटन नितीन गोरे (सदस्य, महाराष्ट्र राज्य प्रदूषण नियंत्रण मंडळ) यांच्या हस्ते झाले. यावेळी सचिन वाघमारे यांच्यासह विविध क्षेत्रातील मान्यवर उपस्थित होते. कार्यक्रमाच्या शेवटी मधुकर गोसावी यांनी सर्व रक्तदाते व उपस्थितांचे आभार मानत, “हीच खरी मानवसेवा!” असे ठामपणे अधोरेखित केले.