✍️ महाराष्ट्र २४ | विशेष प्रतिनिधी | दि. २ जानेवारी २०२६ | नवं वर्ष उजाडलंय… पण भारतीय क्रिकेटसाठी हे वर्ष फक्त कॅलेंडर बदलणारं नाही, तर इतिहास घडवणारं ठरू शकतं. २०२६ हे वर्ष टीम इंडियासाठी आव्हानांनी भरलेलं आहे. कारण या एका वर्षात वर्ल्ड कपचा दबाव आहे, तर सलग दौऱ्यांची कसोटीही आहे. खेळाडूंना श्वास घ्यायलाही उसंत नाही, अशी ही क्रिकेटची रणधुमाळी असणार आहे.
या वर्षाचा केंद्रबिंदू आहे — आयसीसी पुरुष टी20 वर्ल्ड कप २०२६. ७ फेब्रुवारी ते ८ मार्च दरम्यान भारत आणि श्रीलंका संयुक्तपणे या स्पर्धेचं आयोजन करणार आहेत. २०२४ मध्ये रोहित शर्माच्या नेतृत्वाखाली भारताने वर्ल्ड कप जिंकला होता. मात्र सलग दोन वेळा टी20 वर्ल्ड कप जिंकण्याचा पराक्रम आजवर कोणत्याही संघाला करता आलेला नाही. त्यामुळे यंदा टीम इंडियासमोर इतिहास रचण्याचं मोठं आव्हान आहे.
विशेष बाब म्हणजे, यंदाचा टी20 वर्ल्ड कप नव्या चेहऱ्यांचा आणि नव्या नेतृत्वाचा असेल. सूर्यकुमार यादवच्या नेतृत्वाखाली युवा भारतीय संघ मैदानात उतरणार आहे. रोहित शर्मा आणि विराट कोहली यांनी टी20 क्रिकेटमधून बाजूला होण्याचा निर्णय घेतला असला, तरी वनडे क्रिकेटमध्ये ते भारताचे कणा राहणार आहेत. २०२७ च्या वनडे वर्ल्ड कपच्या तयारीसाठी त्यांची भूमिका निर्णायक ठरणार आहे.
वर्ल्ड कपआधीच टीम इंडियाला न्यूझीलंडविरुद्ध घरच्या मैदानावर वनडे आणि टी20 मालिका खेळायच्या आहेत. जानेवारी महिन्यात होणाऱ्या या सामन्यांमधून संघाची तयारी तपासली जाणार आहे. वर्ल्ड कपनंतर मात्र भारताचा क्रिकेट प्रवास थांबत नाही.
जूनमध्ये अफगाणिस्तान भारत दौऱ्यावर येणार आहे. जुलैमध्ये इंग्लंडचा कठीण दौरा, ऑगस्टमध्ये श्रीलंकेविरुद्ध कसोटी मालिका, सप्टेंबरमध्ये बांगलादेश आणि अफगाणिस्तान, तर ऑक्टोबर-नोव्हेंबरमध्ये पुन्हा न्यूझीलंडचा दौरा — म्हणजे वर्षभर क्रिकेटचा महापूर आहे.
याशिवाय एशियन गेम्स २०२६ मध्येही भारतीय संघ सहभागी होणार आहे. त्यामुळे खेळाडूंच्या फिटनेसपासून ते संघनिवडीपर्यंत बीसीसीआयसमोरही मोठं आव्हान असणार आहे.
एकीकडे युवा खेळाडूंना संधी, दुसरीकडे अनुभवी खेळाडूंचा अनुभव… २०२६ मध्ये टीम इंडिया फक्त सामने खेळणार नाही, तर स्वतःची पुढची दिशा ठरवणार आहे. हे वर्ष भारतीय क्रिकेटसाठी निर्णायक ठरेल, यात शंका नाही.