महाराष्ट्र 24 | विशेष प्रतिनिधी | दि. ३१ जानेवारी २०२६ | कालपर्यंत जे सोने-चांदी आकाशाशी स्पर्धा करत होते, तेच आज थेट जमिनीवर आदळल्याचं चित्र आहे. पंधरा दिवसांच्या विक्रमी तेजीनंतर अवघ्या दोन दिवसांत सोन्याच्या दरात तब्बल २० हजार रुपयांची, तर चांदीच्या दरात थेट १ लाख रुपयांची घसरण—ही केवळ आकड्यांची खेळी नाही, तर बाजाराच्या मानसिकतेवरचा जोरदार आसूड आहे. कालपर्यंत “आज घेतलं नाही तर उद्या महाग होईल” असं म्हणणारा गुंतवणूकदार आज “थांबा, अजून किती पडतं ते बघू” या भूमिकेत आला आहे. जळगावसारख्या सराफ बाजारात पावणे दोन लाखांवर पोहोचलेलं सोने थेट १ लाख ६० हजारांवर आलं, तर चार लाखांचा टप्पा ओलांडलेली चांदी थेट तीन लाखांवर घसरली. र—काल सोन्याला वंदन, आज त्याच्यावर प्रश्नचिन्ह!
ही घसरण केवळ स्थानिक नाही, तर राष्ट्रीय पातळीवरही तितकीच धक्कादायक आहे. दिल्लीत ९९.९ टक्के शुद्धतेचं सोने एका दिवसात १४ हजार रुपयांनी घसरून १ लाख ६९ हजारांवर आलं. गुरुवारी जे १ लाख ८३ हजारांच्या उच्चांकावर होतं, ते आज अचानक उतरती कळा का घेऊ लागलं? चांदीचं चित्र तर आणखी बोलकं आहे—४ लाख ४ हजारांवरून थेट ३ लाख ८४ हजारांपर्यंत मजल. सराफ, व्यापारी, गुंतवणूकदार सगळेच एकमेकांकडे पाहत आहेत, “आता पुढे काय?” असा सवाल चेहऱ्यावर. कारण ही घसरण नेहमीसारखी नाही; इतक्या मोठ्या प्रमाणात दर कोसळणं म्हणजे बाजारात काहीतरी ‘मोठं’ हललं आहे, हे नक्की.
आंतरराष्ट्रीय बाजारात पाहिलं तर उत्तर थोडं स्पष्ट होतं. जागतिक पातळीवर सोनं ५ टक्क्यांहून अधिक, तर चांदी तब्बल १२ टक्क्यांपेक्षा जास्त घसरली आहे. काही वेळा चांदी १७ टक्क्यांपर्यंत कोसळली—म्हणजे चमक नाही, थेट झटका! डॉलरमधील हालचाली, नफेखोरीसाठी विक्री, जागतिक गुंतवणूकदारांची अचानक बदललेली भूमिका—या सगळ्याचा एकत्रित परिणाम भारतातही जाणवतोय. प्रश्न असा आहे की ही घसरण तात्पुरती आहे की नव्या ट्रेंडची सुरुवात? —सोने-चांदी म्हणजे देव नाहीत, तेही बाजाराचेच भक्त! आज बाजार नाराज आहे, म्हणून भाव खाली. उद्या पुन्हा खुश झाला, तर दर वर. त्यामुळे ‘घेऊ की थांबू’ या संभ्रमात अडकण्याऐवजी डोळे उघडे ठेवा. कारण सोनं-चांदी नेहमी चमकतात, पण गुंतवणूकदाराला शहाणपणाचीच खरी झळाळी लागते!