महाराष्ट्र 24 | विशेष प्रतिनिधी | दि. १५ फेब्रुवारी २०२६ || राज्याचे उपमुख्यमंत्री Ajit Pawar यांच्या विमान अपघातानंतर देशभरात सुरक्षा व्यवस्थेबाबत गंभीर चर्चा सुरू असतानाच Directorate General of Civil Aviation (DGCA) ने महत्त्वाची घोषणा केली आहे. वैमानिकांच्या मद्यप्राशन चाचणीचे नियम अधिक कठोर करण्यात आले असून आता या चाचण्यांचे व्हिडीओ रेकॉर्डिंग करणे बंधनकारक करण्यात आले आहे. एवढेच नव्हे तर हे व्हिडीओ किमान सहा महिने जतन करून ठेवण्याचे आदेश देण्यात आले आहेत. अपघातानंतर पायलटने मद्यप्राशन केले होते का, चाचणी झाली का, आणि तिचे पुरावे कुठे आहेत, असे अनेक सवाल उपस्थित झाले होते. त्या पार्श्वभूमीवर हा निर्णय अत्यंत महत्त्वाचा मानला जात आहे.
सध्याच्या नियमांनुसार वैमानिक आणि केबिन कर्मचाऱ्यांची उड्डाणापूर्वी तसेच उड्डाणानंतर मद्यप्राशन चाचणी केली जाते. मात्र आता या प्रक्रियेत पारदर्शकता आणण्यासाठी संपूर्ण चाचणीचे व्हिडीओ रेकॉर्डिंग अनिवार्य केले आहे. जर एखादा वैमानिक किंवा केबिन कर्मचारी चाचणीत अपयशी ठरला किंवा मद्यप्राशन केल्याचे आढळले, तर त्याचा अहवाल २४ तासांच्या आत सादर करणे बंधनकारक असेल. तसेच ड्यूटीच्या किमान १२ तास आधी मद्यप्राशन न करण्याचा नियम पुन्हा स्पष्ट करण्यात आला आहे. या नव्या आदेशामुळे भविष्यातील वाद, शंका आणि आरोपांना आळा बसेल, असा विश्वास व्यक्त केला जात आहे.
नव्या नियमांनुसार दोषी आढळल्यास संबंधित कर्मचाऱ्यावर आर्थिक दंड, समुपदेशन किंवा थेट निलंबन अशी कारवाई केली जाऊ शकते. याच दरम्यान देशातील आघाडीची विमान कंपनी IndiGo ने मनुष्यबळ वाढवण्यासाठी सुमारे एक हजार वैमानिकांची भरती करण्याचा निर्णय घेतला आहे. प्रशिक्षणार्थी वैमानिक, वरिष्ठ फर्स्ट ऑफिसर आणि कॅप्टन पदांसाठी ही भरती होणार आहे. वाढत्या विमानवाहतुकीच्या पार्श्वभूमीवर सुरक्षा, पारदर्शकता आणि शिस्त या तिन्ही बाबींवर भर देत डीजीसीएने उचललेले हे पाऊल विमान प्रवाशांसाठी दिलासादायक ठरणार आहे.